Ich Vincentz Chersperger dieczeit der Lechner ambtman ze Weinczu^erl bekenn mit disem brief, das der ersam herr her Hanns Nehem kellner des klosters zu der Guldein Coron von weilend Mitsamen dem Scherer von Krems gekaufft hat ain gerttl zu irem hof¹, das da gelegen ist in irem gartten hinden an den hof und sto^ezzt an den wagenweg, das da purkchrecht ist von ainem yeden der Lechner ambtman zu Weinczu^erl, und von dem selben ga^erttlein man mir oder meinen nachko^emen ambtman daselbs jerleich zu purkchrecht gibt sechs Wienner helbling an sand Michels tag und nicht mer. Und leit auch zu na^echst an irem tailgartten, dauon sew auch dient mir oder aim yeden nachkomen der Lechner ambtman vir Wienner pfennig auch an dem obgenanten sand Michels tag jerleich. Und das nu alles zu aim gartten gemacht und ingeczogen ist. Es hat auch der obgenant her Hanns das egemelt gerttel mitsampt dem irem tail mit aller zugeho^erung in nucz und gwer inngehabt lennger denn rechtteg, und hat auch das mit wissen und willen von dem obgenanten Mitsamen und von mir als ainem ambtman auf emphangen und das zu rechter weil und zeit jerleich verdient. Und gib im auch des daru^eber disen offen brief besigelten mit des edlen vesten Jo^ergen des Grabner dieczeit slussler und veldrichter innerhalb des Champs anhangunden insigel, den ich mit vleiss darumb gepeten hab, doch im und seinen eriben an schaden, wann ich selbs nicht insigl enhab. Der geben ist an suntag nach phingsten, nach Kristi gepu^erd vierczehenhundert jar und in dem achtvnddreissikgistem jare.

Source Fulltext: PANGERL, Goldenkron (=FRA II/37, Wien 1872) S. 434