In nomine domini amen. Anno nativitatis eiusdem millesimo quadringentesimo quadragesimo quarto, indictione septima, die vero vigesima prima mensis Julii, hora meridiei vel quasi, pontificatu sanctissimi in Christo patris et domini domini Ffelicis digna dei providentia papae quinti anno ipsius quarto in civitate Crumpnaw in domo venerabilis domini Johannis archidiaconi Bechinensis¹ in ecclesia Pragensi in coenaculo suo aestuali dictae Pragensis diocesis, in mei notarii publici infrascripti, testiumque praesentia subscriptorum ad hoc specialiter rogatorum et vocatorum constitutus personaliter venerabilis pater dominus Johannes abbas monasterii Sanctae Coronae ordinis Cisterciensis praefatae diocesis Pragensis, tenens in suis manibus litteram quandam in pergameno scriptam, sigillo de cera alba in pressula pergameni consignatam, venerabili domino Johanni archidiacono praedicto ad videndum et conspiciendum exhibuit et praesentavit, qui eandem intuens ac sigillum diligenter conspiciens michi notario publico subscripto ulterius ad videndum et legendum dedit et porrexit. Ipsam ego tollens cognovi fore illustris domini Alberti ducis Austriae et Stiriae etc. sigillo suo munitam, eamque alta voce et intelligibili coram omnibus assidentibus legi, reperique ipsam sanam et integram, non vitiatam, nec in aliqua parte sui suspectam, sed omni prorsus vitio carentem. Sigillum quoque ipsum erat de rubea cera, albae cerae impressum, in cuius medio quinque apparebant anguli et in uno quoque angulorum unus clipeus cum suo certo signo seu figura eminebat. In medio quoque supremi clipei elevatura cerae quaedam per transversum apparebat; in secundo a parte dextra descendendo tres leones ab una cum elevatura ab altera parte; in tertio et quarto in uno quoque figura quasi aquilae volantis existebat; in quinto demum clipeo figura leonis supra dorsum quasi erecta cauda apparebat. Litterae vero circumferentiales ut prima facie apparebant, quibus praeposita erat crux, erant istae: ,Albertus dei gratia dux Austriae Stiriae‘. Tenor vero ipsius litterae per omnia sequitur et est talis: (Folgt der Wortlaut der Urkunde ddto. Wien, 8. August, 1431.) Attendens itaque venerabilis pater dominus Johannes abbas suprascriptus propter viarum pericula et discrimina ac alios casus fortuitos et sinistros difficile nimisque periculosum existere ipsam litteram originalem aliis exibere (sic, exhibere) seu hincinde transferri aut transmitti, requisivit et petivit me notarium publicum subscriptum, illam de verbo ad verbum transsumi, copiari et exemplari ac etiam cum intelligente ydioma Teotunicum collationari, ut sic transsumtae ac collationatae ubique et per omnia tamquam originali plena fides adhibeatur, postulando desuper fieri et confici per me notarium publicum subscriptum unum vel plura si opus fuerit publicum seu publica instrumenta. Acta sunt haec anno, indictione, die, hora, mense, pontificatu et loco quibus supra, praesentibus ibidem honorabilibus et discretis viris dominis Johanne plebano in Posorzicz² Olomucensis diocesis, Nicolaio capellano in Crumpnaw, nec non prudentibus viris Venceslao protunc magistro civium et Marssone consule concivibus in Crumpnaw testibus circa praemissa fidedignis.||
Signum Tabellionatus||
Et ego Johannes olim natus Johannis de Rozmberg clericus Pragensis diocesis, publicus apostolica et imperiali auctoritatibus notarius, quia praedictae litterae tentioni, ostensioni etc. etc. (gewöhnliche Beglaubigungsformel, worin auch gesagt ist ,cum appensione sigilli . . . Johannis archidiaconi Bechinensis supranominati‘.)

Source Fulltext: PANGERL, Goldenkron (=FRA II/37, Wien 1872) S. 445-446