Procopius de Rabenstein regni Bohemiae cancellarius notum facio tenore praesentium universis, me emisse et comparasse a venerabili Gerhardo abbate monasterii Sanctae Coronae cum consensu totius conventus eiusdem monasterii villas Zelnawa, Pergfride, Saldenow, Purgstal, Sonberg et Hinttringe¹ pro certa pecuniae quantitate pro me, fratribus, haeredibus et successoribus meis ad annos quinquaginta duntaxat a data praesentium continuo numerandos. Quibus lapsis promitto nomine meo, fratrum, haeredum et successorum meorum bona fide, dolo et fraude remotis, easdem villas cum omnibus iuribus, pertinentiis, usibus, fructibus et emolimentis ac omnibus pertinentiis earum condescendere et resignare praefatis abbati et conventui dicti monasterii seu illis, qui pro tempore fuerint, nihil mihi aut fratribus vel haeredibus aut successoribus meis iuris, proprietatis, possessionis aut dominii vel actionis in eisdem relinquendo. In quorum fidem et testimonium has litteras fieri et sigilli mei iussi appensione communiri. Et ad pleniorem certitudinem praemissorum venerabilis dominus Wenczeslaus de Krumlow administrator archiepiscopatus et decanus ecclesiae Pragensis, et Hilarius de Lithomerzicz decanus capellae regiae omnium sanctorum in Castro Pragensi et prothonotarius regius ad vota et requisitiones meas sigillis suis pendentibus has meas litteras firmaverunt in testimonium omnium praemissorum. Datum Pragae anno domini millesimo quadringentesimo sexagesimo, in die sanctorum Bonifacii et sociorum eius.

Source Fulltext: PANGERL, Goldenkron (=FRA II/37, Wien 1872) S. 502-503