Nos frater Adam abbas monasterii Plasz ordinis Cisterciensis Pragensis dyocesis notum facimus praesentium inspectoribus universis, quod nos die data praesentium personaliter visitantes filiam nostram dilectam monasterium Sanctae Coronae nobis inmediate subiectam, assidente nobis venerabili in Christo patre ac domino domino Laurentio abbate Nepomucensis monasterii eiusdem ordinis atque dyocesis, nobis in capitulo cum praenominato patre ac domino praesidentibus post lectionem sanctae regulae cum tractare incepissemus de negotiis ordinis ac reformatione, surrexit ac humiliter veniam petiit venerabilis pater dominus Nicolaus Frw¨auff tunc coabbas noster in praenominato monasterio Sanctae Coronae, allegans atque deducens in medium suam insufficientiam et alias praeeminentes causas, quas etiam antea nobis proposuerat, rogavit instanter, quatenus eum a cura et regimine praefatae abbatiae dignaremur absolvere. Nos autem etsi inviti attendentes tamen suas instantivas preces, aliasque quam varias et rationabiles et praegnantes causas, nos ad hoc merito promoventes eum iuxta votum suum a cura et regimine praedictae abbatiae cum consilio fratrum ibidem professorum in dei nomine absolvimus. Qui ita absolutus non coactus neque dolo fraude circumventus, sed sua sponte libere et bene compos suae mentis ut ipse asseruit, renunctiavit omnibus iuribus, quae sibi in praefata abbatia competere poterant, eadem jura cum sigillo et secreto suo tradens in manus nostras. Et quoniam praefati monasterii Sanctae Coronae iurisdictio specialiter ad nos spectat, ne ipsum monasterium per vacuationem diutinam suae viduitatis deploraret incommoda, considerantes et scientes, quod eisdem fratribus in eodem monasterio professis specialiter spectaret electio, nos hysdem fratribus terminum praefiximus eligendi, protestantes quod tres viae electionis sint, scilicet inspirationis divinae, scrutiny et compromissi, eos ammonendo ut viam per quam vellent procedere (eligant). Elegerunt unanimiter viam compromissi ac omnes compromiserunt in nos tamquam in patrem visitatorem, ut eis vellemus providere de viro religioso et approbato, rogantes hoc onus in nos suscipere. Nos vero considerantes paucitatem personarum illius conventus, confidentes de adiutorio divino hoc onus in nos suscepimus, atque iterato capitulo congregato requisivimus, an adhuc idem senior dominus abbas atque idem fratres eiusdem mentis essent et stare vellent ac pro abbate habere illum, quem nos nominaremus. Qui omnes unanimiter responderunt, quod ita, ac rogaverunt sibi nominare patrem ac abbatem quemcumque vellemus ac eis illum praeficere. Cui responderunt se velle in omnibus obedire. Nos attendentes petitionem eorundem fore rationabilem, statuimus atque vocavimus in medium religiosum virum fratrem Conradum monasterii Lanckheym et nostri patris ac domini visitatoris professum, sacerdotem et monachum, sed tunc temporis ex concessione et gratia nostri antedicti visitatoris bursarium nostrum, quem putavimus ac putamus ad hoc officium abbatiae, quod in nostra conscientia tunc accepimus, sufficientem utputa virum morum gravitate fulgentem, honestae vitae, laudabilisque conversationis, competentis litteraturae, de legittimo thoro natum. Petivimus ac rogavimus ut nostrae electioni praeberet assensum. Ipse vero quamvis per multas preces et allegationes suam declarasset insufficientiam ac dicendo quod non liceret sibi sine consensu sui abbatis petita licentia et obtenta nulli posse praeesse praelaturae, etiam assignando, quod praelatura sine consensu sui praelati accepta foret nichili (sic) et inanis. Nos ei compromisimus ipsum certum fore de consensu sui praelati. Ipse vero nolens se divinae voluntati ostendere contrarium electioni consensit, cantoreque mox ympnum ,Te deum laudamus‘ incipiente, campanisque pulsantibus; ipsum ad ecclesiam sollempniter deducentes installavimus et sic installatum ad capitulum reduximus. Et praestito iuramento iuxta apostolica statuta de non alienandis rebus monastery, prout in iuramento continetur, eidem administrationem dicti monastery Sanctae Coronae in spiritualibus et temporalibus commisimus et per attactum nostrae regulae investivimus atque auctoritate sacri Basiliensis concily ac nostri capituli generalis et nostra paterna confirmavimus. Accedentesque praefatus Nicolaus Frw¨auff quondam abbas in antedicto monasterio fratresque Laurentius, Ambrosius custos, Caspar, Laurentius professionem sibi sponte et voluntarie profitentes secundum regulam sancti Benedicti obedientiam de bono usque ad mortem. In quorum omnium praemissorum firmitatem et patens testimonium sigillum nostrum fecimus appendi. Datum et actum in praefato monasterio Sanctae Coronae anno, mense et die ut infra.||
Et nos frater Laurentius abbas monastery Nepomucensis supra memoratus protunc assessor praedicti reverendi patris ac domini domini Adae Plassensis abbatis omnia et singula praemissa nobis praesentibus acta et facta etiam sigilli nostri appensione communivimus. Praeterea nos fratres Nicolaus quondam abbas, Laurentius, Ambrosius custos, Caspar, Laurentius professi totusque conventus monastery saepedicti Sanctae Coronae praedictam electionem fuisse et fore iustam et canonicam, ipso (sic, ipsi) domino Conrado tamquam abbati nostro vero et legittimo obedientiam secundum formam ordinis fecimus juxta statuta regularia. In quorum omnium testimonium sigillum nostri conventus una cum sigillis reverendi patris nostri domini visitatoris et domini Laurenty venerabilis abbatis Nepomucensis est appensum. Datum anno domini millesimo quadringentesimo octogesimo primo, Kalendas May.

Source Fulltext: PANGERL, Goldenkron (=FRA II/37, Wien 1872) S. 531-533