Ad laudem et honorem summae trinitatis nec non ad decorem (sic) et gloriam gloriosissimae virginis Mariae ac totius coelestis curiae, ad sanctae denique nostrae religionis profectum nos frater Leonhardus abbas coenobii intemeratae dei genitricis Mariae in Plazs Cisterciensis ordinis Pragensis diocesis recognoscimus per praesentia scripta, quod nos anno nostrae salutis M^o CCCCC^o XXVIto vicesima prima die Februarii, assidente nobis reverendo patre domino Wolfgango Nepomucensis monasterii abbate¹, dilectam filiam nostram nobis inmediate subiectam, venerabile scilicet monasterium Sanctae Coronae supratacti ordinis praefataeque diocesis canonice et personaliter visitantes ipsum monasterium aliqualiter desolatum reperimus et taliter, ut ad omnimodam reformationem nostri sacri ordinis ex regularium locorum defectu reducere prout libenter vellemus haud potuimus, ut tamen nostro officio tam satisfecisse quam animarum ibidem domino famulantium saluti consuluisse, ac ipsius monasterii commodo et utilitati quantum ex alto nobis permittitur defuisse minime arguamur, et personae regulares inibi degentes sanctae obedientiae merito non priventur, pro maiori quoque conformitate ipsorum ad prima ordinis monasteria infra assignata literis demandare decrevimus, quae etiam in regula sancta, carta charitatis, Clementinis, Benedictinis, libellis diffinitionum ac usuum, ceterisque statutis nostri almi Cisterciensis ordinis plenius habentur. In primis. Cum divini cultus devota persolutio sit coelestium spirituum deum iugiter laetantium salubris conformatio, volumus ac mandamus ac domino abbati, priori, subpriori, cantorique committimus, ut divinum officium nocturnum pariter ac diurnum tractim distinsteque cum verborum integritate in uno sono cum punctis et pausis debitis non nimis basse nec nimis alte solito melius simul et semel in ecclesia persolvant nec aliquis per dominum abbatem rationabiliter excusetur, ac cursum beatissimae dei genitricis Mariae cum officiis defunctorum consuetis iuxta consuetudinem in ordine introductam et hactenus observatam ibidem peragant, debitas ac profundas inclinationes tam ad collectas et ,gloria patri‘ quam ad dulcissima nomina Jesus et Maria quando proferuntur, faciant, ceteraque omnia hucusque in ordine observata observent maiori tamen diligentia. Et cum parum aut ferme nihil prosit solo habitu exteriorem hominem decorare, nisi homo interior fuerit ordinis observantiis et disciplinae virtutibus adornatus, idcirco dominum abbatem omnesque huius domus professos seriosius in domino hortamur, ut omnes observantias regulares cum tribus ordinis essentialibus, castitate videlicet, paupertate et obedientia diligenter observent. Et ut iam nominata salubriter perficiantur, proprietatisque vitium ab hac domo radicitus auferatur, sub censuris ordinis in diffinitionibus contentis inhibemus singulis et universis huius monasterii professis ac regularibus personis, ne quid proprii habeant sed omnia sive a parentibus seu alias undecunque porrecta, sive per labores manuum vel qualitercunque acquisita non nisi domini abbatis licentia obtenta recipere audeant vel tenere praesumant, sed et omnia usui necessaria eis concessa abbati suo quadragesimali tempore brevibus assignent, domino abbati suisque officialibus mandantes, ut secundum regulam sancti Benedicti fratres in victu vestituque ac aliis necessariis iuxta facultatem domus diligenti cura provideat, maxime autem infirmos, ut omnis tollatur excusationis occasio. Cum denique religiosi divinis obsequiis mancipati a secularium tumultu potissimum autem mulierum consortio esse debeant alieni, statuimus ut nullus fratrum septa monasterii egrediendo ad villas seu silvas aliave loca suspecta sine speciali licentia domini abbatis aut prioris declinet. Quibus etiam damus in mandatis, ne tempore dedicationis nec alio quocunque tempore mulieres cameras vel cellas fratrum ingredi permittant, etiam si qualibet consanguinitatis vel affinitatis propinquitate iungantur, propter suspitionis notam, sed in habitatione pro hospitibus deputata iuxta domus facultatem honeste provideant, transgressores poena ordinis compescendo. Hortantes quoque volumus post completorium et nocturnis temporibus, in aestate scilicet usque ad primas, in quadragesima vero usque ad tertias silentium iuxta tenorem regulae singuli observent, finitoque completorio post spatium unius horae dormitum eant, dormitoriumque claudant. Omnes insuper et singulas personas huius domus affectu sincero monemus, auctoritateque paterna in domino caritative hortamur, ut omnes et singulas ordinis observantias secundum positionem loci diligenter observent, utputa de computationibus tam abbatis quam aliorum officialium singulis annis faciendis, ad ,salve regina‘ post completorium singulis sese praesentandis processionibus, singulis festivitatibus anni in ordine per claustrum seu ambitum faciendis, sigillis conventus custodiendis, contributionibus ordinis persolvendis, debitis non contrahendis, possessionibus non alienandis; tectis et aedificiis monasterii ruinosis reparandis, missis adminus ter singulis ebdomadibus ab uno quoque sacerdote legendis, iunioribus dominicis diebus et festivitatibus sermonum communicandis, annalibus seu generalibus confessionibus omni tempore quadragesimali domino abbati aut eius vices habenti faciendis, lectionibus mensae extra et in refectorio habendis etc. In calce demum omnes et singulos huius monasterii professos in Christo hortamur et obsecramus, quatenus dominum deum super omnia diligant, eique totis viribus devote serviant, vota sua reddere minime negligant, abbatem suum sincera veneratione diligant, pacem mutuam et dilectionem inter se habeant, subditi ac iuniores superioribus senioribusque humiliter obediant, superiores seu seniores subditos atque iuniores suos caritative pertractent, mente et corpore se mundos immaculatosque singuli custodiant, dissensiones, rixas, iras, invidias, ceteraque vitia summopere caveant, vitam apostolicam in praesenti ducant, ut cum ipsis in futuro aeternaliter regnare valeant amen. Hanc autem cartam nostrae caritativae visitationis ac paternae reformationis volumus penes dominum abbatem aut cantorem, qui pro tempore fuerit, custodiri ac per eum ,ne ignorantiae velum alicui valeat suffragari‘ singulis quintis feriis quattuor temporum de verbo ad verbum in praesentia omnium legi. Data in suprafato monasterio Sanctae Coronae sub sigillorum nostrorum appensione, anno, die, mense quibus supra.

Source Fulltext: PANGERL, Goldenkron (=FRA II/37, Wien 1872) S. 589-592