Ego Chonradus dictus Glaser civis Pataviensis et Gerdrudis uxor sua notum facimus universis, praesentes litteras inspecturis, quod nos deliberatione diligenti praehabita de beneplacito heredum nostrorum vendidimus iusto venditionis tytulo vineam nostram sitam in loco qui wlgariter dicitur ,am Gebling‘¹, cui vineae Cholomanni magistri montis et Chonradi dicti Prukner de Patavia confinant, religiosis viris . . abbati et conventui monasterii de Sancta Corona ordinis Cisterciensis pro nonaginta libris denariorum Wiennensium, quas libras recognoscimus nos ab ipsis abbate et conventu recepisse integre et in usus nostros necessarios et utiles convertisse, de conniventia et consensu honesti viri Cholomanni magistri montis praefati, cui venerabilis pater dominus Heinricus abbas monasterii Melicensis² dominus fundi suum ad hoc consensum et mandatum praestitit, in cuius videlicet Cholomanni manibus sponte renuntiavimus et cessimus dictae vineae et omni iuri nobis aut heredibus nostris in ipsa quomodolibet competenti, quae etiam vinea ipsis abbate et conventu per praefatum magistrum montis extitit recollata, salvo iure civili triginta denariorum praenominato abbate (sic, abbati) monasterii Melicensis in festo sancti Cholomanni annis singulis in signum dominii solvendorum. In cuius rei testimonium praesentes litteras sigillo reverendi viri domini Ludolfi decani Chremensis, coram quo etiam omnia praemissa placitata et ordinata sunt, quia proprio caruimus, petivimus fieri communitas. Huius rei testes sunt discreti viri dominus Rinherus Westualus plebanus in Dobrasperg, Chonr(adus) dictus Chulnprein civis Chremensis, Heinr(icus) dictus Voker, Vlricus dictus Loch et plures alii fidedigni. Acta sunt haec Chremsae anno domini millesimo trecentesimo tricesimo, in die ascensionis. Et nos Ludolfus divina miseratione decanus Chremensis recognoscimus contractum huiusmodi coram nobis et testibus praemissis esse factum et sigillum nostrum ad petitionem partium praesentibus appendisse.

Source Fulltext: PANGERL, Goldenkron (=FRA II/37, Wien 1872) S. 77-78