In nomine domini amen. Ego Marquardus de Weiksel¹ ad notitiam universorum Christi fidelium, per quorum manus praesentes transierint, cupio devenire, quod praehabita deliberatione diligenti, de dilectae cothoralis (sic) meae Katherinae, liberorumque meorum omnium et amicorum aliorum consensu ac mea propria et libera voluntate singula et universa iura, quae successione paterna et iure emptitio habui et possedi pacifice et quiete in villa dicta Weiksel et omnibus suis pertinentiis, videlicet rusticis, curiis, domibus, censibus, agris, cultis et incultis, terris, montibus, aquis aquarumve decursibus, piscationibus, pratis, nemoribus, rubetis, venationibus et molendino, honorabilibus viris et dominis domino Sywoth(oni) abbati et conventui de Sancta Corona ordinis Cysterciensis Pragensis dyoecesis iure perpetuo vendidi pro ducentis sexagenis grossorum, pro qualibet sexagena sexaginta grossos Pragenses secundum terrae consuetudinem computando, de qua summa pecuniae recognosco mihi serie harum per eosdem venerabiles dominos fore totaliter satisfactum. Ne autem liberorum meorum vel amicorum sive extraneorum aliquis tempore aliquo memoratos dominos dominum abbatem et conventum monasterii Sanctae Coronae praefati, qui nunc sunt vel successores eorum in dicta villa Weiksel et universis suis pertinentiis et iuribus nominatis superius et non nominatis valeat in dispendium animae suae vel audeat aliquatenus impedire, eisdem dominis de Sancta Corona in testimonium et evidentiam omnium praemissorum et in robur perpetuae firmitatis praesentes dedi sigillorum strenuorum militum et dominorum Perzibikonis purcravii de Chrvmnaw², Jeskonis de Zchekaw³ ac proprii mei sigilli munimine roboratas. Datum et actum anno domini MCCC^o tricesimo septimo, quarto Idus Januarii.

Source Fulltext: PANGERL, Goldenkron (=FRA II/37, Wien 1872) S. 89-90