Ego Margareta relicta Henrici Choberlini piae recordationis quondam civis Pataviensis et Cristina vera filia eorundem ad notitiam universorum Christi fidelium tam praesentium quam futurorum, per quorum manus praesentes transierint, cupimus devenire, quod matura et diligenti deliberatione praehabita, bona nostra et libera voluntate vineam nostram in Austria circa Chremsam jacentem, quae ,Domus vini‘ sive Weynhaus¹ wlgariter nuncupatur, venerabilibus viris et religiosis domino Sybbotoni abbati et conventui de Sancta Corona ordinis Cysterciensis Pragensis dyocesis vendidimus pro centum et quinquaginta talentis minus uno talento Pataviensium denariorum iure hereditario possidendam, universa jura, quae in eadem vinea sine impedimento et impetitione cunctorum hominum libere possedimus, ad dominium eorundem dominorum monasterii Sanctae Coronae inantea transferentes. De qua etiam vinea pro jure emphyteotico, quod generaliter dicitur purchrecht, dominae Perhtae de Wynkel et heredibus suis, per quam dominam praedicta vinea ad petitionem nostram domino abbate praedicto et capellano suo fratre Paulo, ac domino Vlrico plebano de Sancto Stephano, nobis quoque ac pluribus fidedignis praesentibus, est iuxta consuetudinem resignata, singulis annis in festo sancti Mychaelis duos Wyenenses denarios solvere tantummodo tenebuntur. Praeterea recognoscimus nobis per memoratos dominos abbatem et conventum praedicti monasterii de supradicta pecunia fore totaliter satisfactum. Ne autem aliquis hominum cuiuscunque sit conditionis, praefatos dominos abbatem et conventum de Sancta Corona in praedicta vinea valeat aliquatenus impedire, promittimus bona fide nostra sine dolo, ipsis saepedictis dominis memorati monasterii Sanctae Coronae iuxta modum et consuetudinem terrae Australis praedictam vineam liberaliter disbrigare. Testes autem omniutn istorum sunt: praedicta domina Perchta de Wynkel, dominus Vlricus plebanus de Sancto Stephano, dominus Gundakarus plebanus et canonicus ecclesiae Pataviensis, Vlr(icus) judex cum filio suo Gundakaro de Cremsa, Nycolaus Berner civis ibidem, Albertus de Anyon et plures alii fidedigni. Ut autem universa suprascripta firma permaneant in aeternum, praesens scriptum fieri iussimus et sigillo praedicti reverendi domini domini Gundakari plebani et canonici praedictae ecclesiae Pataviensis, quia proprio caruimus sigillo, petivimus cum instantia et ordinavimus roborari. Datum et actum anno domini M^o CCC^o tricesimo septimo, in dominica ante festum omnium sanctorum.

Source Fulltext: PANGERL, Goldenkron (=FRA II/37, Wien 1872) S. 92-93