Clemens episcopus servus servorum dei dilectis filiis . . archidiacono Gradicensi in ecclesia Pragensi et . . officiali Pragensi et . . priori fratrum ordinis Praedicatorum Pragensium salutem et apostolicam benedictionem! Conquestus est nobis Mauritius de Wogicz clericus Pragensis dyocesis, quod Lutholphus abbas et conventus monasterii Sanctae Coronae ordinis Cysterciensis dictae dyocesis cum ausu sacrilego captivantes ac duris afficientes verberibus ipsum carceri manciparunt et detinuerunt aliquamdiu eidem carceri mancipatum; iidem quoque super quibusdam pecuniarum summis et rebus aliis iniuriando eidem: ideoque discretioni vestrae per apostolica scripta mandamus, quatinus si de huiusmodi captione, verberatione, carceris mancipatione ac detentione vobis constiterit, dictum abbatem et illos sacrilegos de dicto conventu, quos super hiis inveneritis magis culpabiles extitisse, tamdiu appellatione remota excommunicatos publice nuntietis et faciatis ab omnibus artius evitari, donec passo iniuriam satisfactum fuerit, competenter et idem abbas cum vestrarum testimonio literarum ad sedem apostolicam venerit absolvendus, et hii huiusmodi criminis praecipui patratorum debite meruerint absolutionis beneficium obtinere. Super aliis vero audiatis causam et appellatione remota usuris cessantibus debito fine decidatis, facientes quod decreveritis per censuram ecclesiasticam firmiter observari, non obstante indulgentia qua filii . . prior ordini tuo a sede apostolica dicitur esse concessum, quod ipsius fratres non teneantur se intromittere de quibuscunque negotiis, quae ipsis per eandem sedem (sic, eiusdem sedis) litteras committuntur, nisi in eis de concessione huiusmodi plena et expressa mentio habeatur. Quod si non omnes hiis exequendis poteritis interesse, duo vestrum ea nichillominus exequantur. Datum Awione, Kal. Februarii, pontificatus nostri anno quinto.

Source Fulltext: PANGERL, Goldenkron (=FRA II/37, Wien 1872) S. 102-103