Wenceslaus dei gratia Romanorum rex semper augustus et Boemiae rex notum facimus tenore praesentium universis, quod licet dudum ab illustribus quondam Boemiae regibus praedecessoribus nostris et signanter a serenissimo principe domino Karolo Romanorum imperatore semper augusto et Boemiae rege genitore nostro et consequenter a nobis edictum exierit, ne quispiam, cuiuscunque gradus status aut conditionis existat, ab ecclesiasticis et praesertim regularibus personis bona, census seu quaelibet emolimenta absque nostro speciali consensu emere aut comparare praesumat, tractuque temporis edictum huiusmodi adeo sit omnium notitiae inculcatum, ut nullus per ignorantiam legittima se possit excusatione tueri. Quia tamen Johannes dictus Gunstort a religiosis olim abbate et conventu monasterii Sanctae Coronae devotis nostris dilectis decem sexagenas annui census in et super molendino in Netolycz quod wlgariter ,die hofmul‘¹ vocatur, et alibi absque nostro scitu, voluntate et consensu dinoscitur comparasse, et ob hoc tam ex virtute edicti praedicti quam ex observantia laudabili dudum tenta idem census ad nos velud regem Boemiae sit rationabiliter devolutus, nos inspectis studiosis obsequiis per honorabilem Johannem de Netolicz cappellanum nostrum devotum dilectum nobis exhibitis et inposterum uberius exhibendis, sibi animo deliberato, regia auctoritate Boemiae et de certa nostra scientia jus, nostrum nobis in censu praedicto competens dedimus et donavimus, damus et tenore praesentium gratiose donamus, mandantes abbati et conventui praedicti monasterii firmiter et expresse; quatenus ad eundum Johannem cum censu praedicto, si et in quantum ad nos devolutus est, ordinarium respectum habeant, sibique eundem annis singulis expediant integraliter et persolvant, prout gravem indignationem nostram voluerint artius evitare. Praesentium sub regiae nostrae maiestatis sigillo testimonio litterarum. Datum in Dobrziess anno domini millesimo trecentesimo octuagesimo sexto, die XXIIa mensis Septembris, regnorum nostrorum anno Boemiae vicesimo quarto, Romanorum vero undecimo.||
Auf dem Umbug: Ad mandatum domini regis Johannes Caminensis electus cancellarius.||
Auf der Rückseite: Registrata, Wenceslaus de Jenykow.

Source Fulltext: PANGERL, Goldenkron (=FRA II/37, Wien 1872) S. 178-179