Wir Florian von gotes genaden abpt des gotzhaws dacz Gersten und wir der conuent gemaindleich daselbs wechennen und vergehen fu^er uns und all unser nachko^emen daselbs und tun chund offenleich mit dem prief allen lewten gegenwu^ertigen und chunftigen umb unser lediges und unuerchumertz halbs jeuch weingarten mit seiner zuegeho^erung wie deu genant ist, daz gelegen ist in des Se^alden leytten¹, dy etwenn des Ffriczensdo^erffer gewesen ist und nu° der herren dacz der Heiligen Chro^en ist, da von man gibt ze pu^erkrecht von dem halben jeuch all jar an sand Michels tag den herren von O^esterhofen in i^eren hoff ze Chrems sechs Wyenner phening und nicht mer. Also haben wir den selben weingarten mit wolbedachtem muet, mit gunst und guetleichem und veraintem rat und willen zu der zeit, da wir daz mit recht wol getu^en machten und recht zu tu^en hetten, und auch mit pu^erkherren hant des erbirdigen herren hern Albrechts von Osterhofen yeczund hofmaister in irem obgenant O^esterhofer hof ze Chrems recht, redleich und unuersprochen verchauft und hingeben haben dem ernbirdigen geistlichen herren hern Ernsten abpt des gotzhauss dacz der Heiligen Chro^en und dem ganczen conuent gemaindleich daselbs umb zwaý und zwainczikch phunt gueter Wyenner phening und umb ain halb phunt Wyenner phening ze leykchauff, der wir genczlich an all scheden beczalt sein. Und verczeihen uns darumb des obgenanten weingarten, daz wir noch nyemant andrer von unsern wegen fu^erbaz dhain ansprach, voderung noch rechtens darczue weder darnach nicht mer haben schullen noch mugen vil noch wenikch angeuer. Und des schullen si den obgenant weingarten fu^erbas freyleich und ledigchleich zu rechtem pu^erkrecht in nucz und in gewer innehaben, nuczen und nyessen und allen iren fru^emen damit schaffen, wie seu verlust mit verchauffen, mit verseczen, schaffen, geben und machen, wemb seu wellent, als in daz allerpest wol fueget und chumpt an all irrung. Und sein auch darumb ir recht schermb und geweren fur all ansprach, wo in des not geschiecht mit dem rechten als purkrechts schrems (sic, scherms) recht ist in O^esterreich. Und waz in dar an abget, daz schullen wir in alles ausrichten angeuer, und sullen si daz haben dacz uns und alle dem guet, daz unser obgenantz gotzhaws yndert hat angeuer, wir sein lemptig oder tod. Und geben in des ze v^erchund daruber den gegenwu^ertigen unsern offen prief beste^att mit unser vorgenant abpt Florian dacz Gersten und mit unsers conuent daselbs unser paider angehangen insigeln. Daz ist geschehen da man zalt nach Christi gepurd dreuczehenhundert jar und in dem newn und newnczkisten jar, des mitichens in den phingstveyertagen.

Source Fulltext: PANGERL, Goldenkron (=FRA II/37, Wien 1872) S. 316-317