Ich Hanns Tünstel, ich Magdalen sein hausfrau und ich Barbara des benannten Tünstel tachter(sic) bekennen für uns und für all unser eriben und tun kund offenlich mit dem brief, als uns der erwirdig gaistlich herr abbt Rueger von der Guldein Kron zu rechtem leibgeding verlassen hat sein und seins gotshaws weingarten, des zway jeuch ist und haist im Pueher¹ zu unsrer dreyer leib und lebtag anlain (sic) und nicht lenger, in solher maynung, das wir in von dem selben weingarten jarlich raichen und geben sullen den dritten emmer most aus dem grant in irm hof zu Weinczürel an all ir mue und schaden. Auch sullen wir von unserm tail mosts und si von irm tail den zehent ausrichten. Auch sullen wir jarlich zu gedechtnüs an sand Michels tag dienn von dem selben weingarten in den benanten irn hof dreissig phening. Auch sullen wir den selben weingarten stiftlich und pawlich inhaben als hie nach geschriben stet, das ist vierstund hawn, grueben, misten, stekchen darinn zupringen all iar zu ir notdurfft und alle andrew gewondlich aribait nichts darinn ausgenommen und alles zu rechten zeiten. Auch sullen wir nicht lesen an irn willen und wissen. Auch sullen wir den maisch fürn an ir prezz an all ir mue und schaden. Und ob das wer das ain weingartsteur von ainem landsfursten auskom, so sullen wir von unserm tail des egenannten weingarten dieselben steur ausrichten und sew von irm tail. Auch sullen wir di wasserpruch maurn vnd pessern an all ir mue und schaden, die in dem selben weingartten sind. Auch sullen und mugen wir unsere recht an dem egenanten weingarten nyemand verkauffen noch verseczen an irn willen. Wer auch das wir den selben weingartenpaw verczugen, welherlay paw das wer, des sew uns mit frumen weingartleuten, darumb beweisen mochten, darumb mugen sew uns notten und phentten mit unserm tail mosts bei dem grannt so lang und als verre, uncz wir das alles erstatten, was wir verczogen und versawmpt haben als di aribait oben begriffen ist, und wir haben dann darczu alle unsere recht verlarn. Wann auch der lest leib mit tod abget, wann das ist im jar, so ist in und irm gotshaws der egenannt weingarten wider ledig worden. Es wer dann das der lest leib under uns mit dem tod abgieng nach der heribstaribait, so mugen desselben nagst eriben den weingarten dasselb jar innhaben mit denselben rechten als oben geschriben ist und nicht lenger. Und des zu urkunt geben wir den gegenbrief besigelten mit des erbern Jacoben Slater burger zu Kremcz anhangundem insigel, das er durich unser vleissigen pet willen zu zeugnus der obgeschriben sach an den brief gehangen hat, doch im und sein eriben an schaden. Darunder ich mich verpind mit mein trewn alles das stet zu halden, das an dem brief geschriben stet. Der geben ist zu Krems an sambstag nach sand Merttentag, nach Kristi gepurd vierczehenhundert jar und darnach in dem vierczikistem jare.

Source Fulltext: PANGERL, Goldenkron (=FRA II/37, Wien 1872) S. 436-437