Nos Gerhardus abbas, A prior, B subprior, C cellerarius, totusque conventus monasterii S. Coronae praesentibus publice profitemur, quod attentis humanitate, favore et gratia specialibus magnifici et excellentis domini domini Johannis de Rosenberk capitanei Sleziae, quibus nos temporibus retroactis non mediocri promotione prosecutus est et deo duce procul dubio amplectetur temporibus affuturis, potissime dum magnificentia sua pridem hereditariam sui dominii recepit possessionem, in augmentum cultus divini et dicti monasterii nostri et fratrum uberius incrementum iudicionatum nobis Czerniczensem cum censibus, decimis et ceteris usufructibus in et super hiis quae per (?) prius possedimus recuperata; condescendit, spondemus igitur et nostro ac successorum nostrorum nomine praesentibus promittimus bona et sincera fide, dolo et fraude quibuscunque semotis, talibus bonis per magnificentiam suam et suos maiores nobis in possessione traditis, quorum annuus census demptis decimis paulo minus quam ad nonaginta sexagenas se extendit, contentos esse sine quavis ulteriori inquietatione, quamdiu alia generalis in regno Bohemiae de ceteris nostri monasterii bonis et ceterorum bonorum ecclesiasticorum dispositio fuerit interventa, dictoque domino Johanni de Rosenberk aut suis heredibus et successoribus pro inscriptionibus suis, quibus bona memorata sunt obligata et proscripta existunt, plene et sufficienter fuerit satisfactum. Harum etc.

Source Fulltext: PANGERL, Goldenkron (=FRA II/37, Wien 1872) S. 506