Wenceslaus de Plana archidyaconus ecclesiae et administrator archiepiscopatus Pragensis sede vacante etc. decretorum doctor universis et singulis tam ecclesiasticis quam secularibus praesentibus et futuris, ad quorum praesentia deducta fuerint notitiam, salutem in domino sempiternam! Posteaquam nobis et officio nostro per honorabilem virum dominum Michaelem de Chwalssingk plebanum in Kayow fuit humiliter et devote supplicatum, (ut) litteras indulgentiarum pro dicta ecclesia in Kayow a reverendissimis dominis cardinalibus impetratas et obtentas acceptare et ratificare dignaremur, quarum etiam copiam nobis in scriptis miserat fidem de hiis faciendo, ne litteras ipsas propter viarum discrimina in periculum daret: nos qui cultum divinum pro viribus augere conamur et saluti animarum consulere ubilibet, litteras ipsas indulgentiarum quarum principium fuit - Oliuerius Sabinensis episcopus, Paulus tituli sancti Sixti ac Julianus Ostiensis episcopus etc., finis vero iste: datum Romae in domibus nostris sub anno a nativitate domini millesimo quadringentesimo octuagesimo quarto, die decima mensis Aprilis, pontificatus domini Sixti divina providentia etc. - cum omnibus suis punctis et clausulis acceptamus, approbamus, ratificamus et confirmamus, easque perpetue valere volumus et decernimus. In cuius rei testimonium praesentes litteras fieri et sigillo officii nostrae administrationis iussimus per appensionem communiri. Datum in castro Pragensi anno domini millesimo quadringentesimo octuagesimo quarto, die vicesima septima mensis Septembris. Blasius de Plana notarius capituli Pragensis manu propria subscripsit (auf dem Umbuge).

Source Fulltext: PANGERL, Goldenkron (=FRA II/37, Wien 1872) S. 539-540