Aussen: Dem erwirdigen andechtigen wolgebornnen unnserm lieben getrewen Johann von Rosenberg auf Stracknitz obristen maiester der priorschafft sand Johanns orden in Peheim, Poln, Österreich, Slesy, Merhern unnd Crain. Ferdinannd von gots gnaden Römischer, zu Hungern unnd Beheim etc. khunig etc. Erwirdiger andechtiger! Wolgeborner lieber getrewer! Wir haben die suplication so du unns anstat unnd von wegen des gotzhaus Guldin Cron fürbringen unnd anntwurtten lassen, sambt deiner vnnderthenigen bitt vernomen. Nun sein wir bericht, daz solh gotzhauss oder stifft zertrent vill gueter dauon khömen unnd in dein unnd deines geslechts der von Rosenberg aigen gewalt sein sollen, deshalben unns berürt closter oder stifft ire priuilegia zu confirmiern unnd bestetten, sonnderlich dieweil die so allt unnd lannger jar hernach von kainen unnserer vorfordern fürsten unnd ertzhertzogen zu Österreich, sonnderlich auch nit von weylennd kayser Fridrichen noch kayser Maximilian ersuecht noch bestettigt sein worden, yetzo von newen zethun, weil es inndert yemandts noch zu nachtail khonndt geraichen, nit fugsam sein will; so ferr du unnd dein freundtschafft aber solh gueter, welhe demselben closter zuegehörig gewest unnd yetzo als gemelt in dein unnd deines geslechts aigen gewaltsam gehallten werden, widerumb zu gemeltem closter wie sy vormalln darbey gewesen, komen und bleiben lassen unnd das closter also in sein vorig unnd erst wesen unnd fundation bringen unnd erhallten (wollet), wollen wir dasselb closter mit freyhaiten wider also fürzusehen gnedigclichen gedacht sein, unnd dir gnediger maynung unangezaigt nicht lassen. Geben in unnser statt Lynntz den XX^ten tag Augusti anno etc. im XXXI^ten unnserer reiche des Römischen im ersten unnd der anndern im fünfften.||
Ferdinand m. p. Ad mandatum domini||
B. cardinalis Trid. m. p. regis proprium||
A. Wisinger.

Source Fulltext: PANGERL, Goldenkron (=FRA II/37, Wien 1872) S. 595-596