Nos Otto dei gratia Brandenburgensis marchio et illustris domni¹ Wencezlai in regno Boemiae tutor et capitaneus generalis notum fieri cupimus universis praesentem paginam percepturis, quod cum olim inclitus dominus Ottokarus rex Boemorum domum Sanctae Coronae ordinis Cysterciensis sub abbatia Plazcense locatam seu positam devotius fundaverit, ipsamque bonis quibusdam videlicet Notaliz et Qualischingen cum omnibus suis attinentiis, paschuis, molendinis, pratis, piscationibus ac nemoribus praeditaverit perpetuo tempore possidendis, quemadmodum fratres eiusdem domus privilegiis praedicti domini Ottakari poterunt evidentius demonstrare², nos vestigiis ipsius tenaciter inhaerentes donationem praedictorum bonorum gratam et licitam, imo utpote necessariam recensentes ipsam praesentis scripti nostri patrocinio confirmamus, mandantes nichilominus universis et singulis baronibus ac nobilibus in regno Boemiae constitutis, quatinus fratres praehabitos in bonis superius nominatis non praesumant aliqualiter inpedire, quin fortius ipsos fratres bonorum eorumdem possessores legittimos faciant permanere, ipsisque promotionem debitam conferentes. In cuius rei testimonium praesens scriptum fieri et sigillo nostro iussimus communiri. Datum Pragae anno domini millesimo ducentesimo octuagesimo primo, in epyfania domini.

Source Fulltext: PANGERL, Goldenkron (=FRA II/37, Wien 1872) S. 21-23