Nos Jesko de Zchekow¹, Vincentius de Sahorkowiz² milites (et) Wernerus de Schekers³ cliens notum esse cupimus tam posteris quam praesentibus, quos videre vel audire contigerit praesens scriptum, quod Gregorius cliens eum pleno consensu ac libera voluntate uxoris suae legitimae Catharinae et omnium liberorum suorum, omniumque consanguineorum suorum, quorum interest, religiosis viris domino Ludolpho abbati et conventui ad Sanctam Coronam ordinis Cisterciensis vendidit rite ac rationabiliter curiam suam sitam in villa dicta Krsydel⁴ cum agris, cultis et incultis, signis (sic, silvis ?), pratis, pascuis et aedificiis, omnibusque ad eam simpliciter pertinentibus libere et quiete perpetuo possidendam pro XX et tribus talentis Pataviensium denariorum, quos quidem denarios plene numeratos ipsum a praedictis viris religiosis tulisse tenore praesentium profitemur. Et ipse Gregorius praenominatus cum Catharina uxore sua iam praefata nec non suis heredibus ac consanguineis hereditatem curiae iam praefatae publice coram nobis testibus viris religiosis antedictis libere resignavit, tali conditione adiecta, quod si aliqualis imposterum impetitio vel molestatio quorumlibet oriretur, per quam praedicti religiosi emptam illam hereditatem et solutam non possent libere et commode possidere, ex tunc idem Gregorius huiusmodi ortum iurgium promittit discindere et secundum ius terrae finaliter disbrigare, data plena fide. Et nos praedicti Jesko de Scheckaw, Vincentius de Sahorkowitz milites, Wernerus de Schekers cliens protestamur huiusmodi venditioni ac persolutioni praesentialiter interfuisse, nostraque sigilla praesentibus appendisse, ad petitionem saepedicti Gregorii in testimonium universorum praemissorum. Datum anno domini M.CCC. tricesimo nono, in die sancti Georgii martyris.

Source Fulltext: PANGERL, Goldenkron (=FRA II/37, Wien 1872) S. 97-98