Noverint universi et singuli, quos infrascriptum tangit negotium seu tangere poterit quomodolibet in futurum, nec non et ad quorum audientiam contigerit pervenire, quod ego frater Lyppoldus professus monasterii Milocensis ordinis Praemonstratensis Pragensis diocisis (sic) natus Jesskonis dicti Borowecz de Rowne de licentia et permissione venerabilis domini patris nostri domini Swatomirij abbatis totiusque conventus dicti monasterii Milocensis, praefati patris mei Jesskonis dicti Borowecz tamquam filius obediens petitionibus inclinatus, venditioni bonorum in Rowne, quae memoratus ipse pater meus honorabilibus et religiosis viris domino abbati et conventui monasterii Sanctae Coronae ordinis Cisterciensis pleno iure vendidit et perpetuo possidenda tribuit ac resignavit, libere condescendendo plenariumque praebeo assensum, fateor quoque jus sive hereditarium sive qualecunque per amplius in eis michi non remanere, sed nec ego nec quisquam loco seu nomine meo possumus nec debemus superscriptos (sic) dominos abbatem et conventum pro supernominatis (sic; supranominatis) bonis seu aliquali eorum parte neque pecuniis quibuscunque eorum occasione de cetero vel in futurum ammonere, impetere sive quolibet infestare. Quod si temptatum fuerit per quemcunque, protinus id irritum esse volo, nulliusque roboris nec vigoris. Nos autem Swatomirius divina providentia abbas totusque conventus praenominati monasterii Milocensis per praesentes recognoscimus, quod singula haec per eundem fratrem nostrum Lippoldum facta de nostra sint licentia permissione et assensu. In quorum testimonium et robur sigilla nostra de certa nostra scientia praesentibus fecimus appendi. Datum anno dominicae incarnationis millesimo quadringentesimo VI., feria tertia infra octavas ascensionis domini.

Source Fulltext: PANGERL, Goldenkron (=FRA II/37, Wien 1872) S. 351