Sigismundus dei gratia Romanorum rex semper augustus, ac Hungariae, Boemiae, Dalmatiae, Croatiae etc. rex. Notum facimus tenore praesentium universis, quod licet alias quadam ardua necessitate constricti ad resistendum perversis conatibus et machinamentis haereticorum in Boemia valide consurgentium, qui etiam suae inmanitatis rabie fideles dei christicolas tam morti tradentes atrociter quam in bonis funditus spoliantes, ecclesias dei demolientes, adeo debachati sunt et adhuc in sua pertinacia perdurantes nomen Christianum etiam hodie conantur extinguere penitus, non parcentes sexui vel aetati, bona ecclesiastica tam Pragensis ecclesiae quam etiam aliarum ecclesiarum, monasteriorum et parrochialium, cuiuscunque etiam conditionis existant, tunc temporis certis personis proscripserimus et dederimus possidenda, sicut etiam bona monasterii Sanctae Coronae ordinis Cisterciensis nobili Vlrico de Rozemberg¹ et quibusdam aliis nos fecisse praeterito tempore memoramur. Nos sentientes huiusmodi donationem et alienationem bonorum ecclesiasticorum in personas seculares quacunque occasione seu conditione factas tam a legibus quam a canonibus fore irritas et inanes, nec debere subsistere seu valere, non per errorem aut improvide sed animo deliberato, maturo omnium electorum sacri Romani imperii et aliorum multorum principum, comitum et comunitatum (!) imperii sacri et regni Boemiae comunicato consilio praefatam donationem et alienationem de possessionibus monasterii Sanctae Coronae praefato Vlrico de Rozemberg seu aliis quibuscunque personis quacunque occasione, conditione seu colore factas auctoritate Romana et Boemiae regia tenore praesentium revocavimus, irritavimus, anullavimus, revocamus, irritamus, anulamus et nullius dicimus, pronunctiamus, et declaramus debere fore roboris vel vigoris, decernentes et volentes quod praefatus² honorabilis Rotgerus abbas Sanctae Coronae una cum conventu suo etiam auctoritate propria assumptis sibi ad hoc si opus fuerit fautoribus et amicis, se de eisdem bonis sui monasterii omnibus et singulis, ubicunque etiam fuerint constituta, debeat et possit intromittere, tenere, utifrui et absque impedimentis cuiuscunque etiam nostras litteras habentis seu alias cum violentia possidentis, ac etiam sibi pro recuperatione eorundem bonorum fautores, promotores et adiutores eligere et recipere pro suo comodo (!), quotiens sibi visum fuerit expedire. Praesentium sub nostrae maiestatis sigilli appensione testimonio litterarum. Datum Norembergae anno domini millesimo quadringentesimo vicesimo secundo, proximo die dominico ante festum sancti Bartholomaei apostoli, regnorum nostrorum anno Hungariae etc. tricesimo sexto, Romanorum duodecimo, Boemiae vero tertio.||
Auf dem Umbug links: Ad mandatum domini regis domino G. episcopo Pataviensi³ cancellario referente Franciscus praepositus Strigoniensis.||
Auf der Rückseite: R(egistrata), Henricus Fye.

Source Fulltext: PANGERL, Goldenkron (=FRA II/37, Wien 1872) S. 410-412