Wir Rutgher abbt, Dietreich prior, Hans kelner und das gancz conuent des chloster czu der Guldein Chron bekennen fur uns und unser nachkommen, das wir mit wolbedachten mut und guten willen aintrechtikleich recht und redleich verchaufft und czu chauffen geben haben die wisen, die wir gehabt haben in dem Lympenort oberthalb der Johanyn, die da sere verwochsen gewesen ist, den erbern Micheln Ssacz und dem Grosselpekchen paid czu Chwalsingen, irn eriben und nachkomen umb newn schokch grossen, die sy uns gancz ausgericht und beczalt haben, in solicher beschaiden das sy die egenant wisen frey ynnhaben, nüczen und niessen sullen nach irrer fugsamkeit alls ander ir aigenhaft gut ungeuerlich, an unser und aller menikleich irrung und hindernuss. Wir sullen und wellen auch der egenanten wisen ir vertreter und verantwurter sein gein menikleich als offt in des not geschecht. Und wer den prieff mit irem guten willen innhat, der hat alle die recht, die inn dar inn geschriben sind. Wer aber das sy die obgenant wisen wolten verchauffen, so schullen sy dy uns des ersten anpieten czu chauffen; wolten wir dan der nicht chauffen, so mugen sy die offtgenat (sic) wisen verchauffen ainem gesessen man cze Chwalsing im markt und chainem andern. Und des czu ainer waren urkund geben wir inn den prieff versigelten mit unsrer obgenanten des abbtes und des conuents anhangunden innsigeln. Der geben ist nach Christi gepuerd, tausent vierhundert und dar nach in dem ainundvierczigistem jar, des vierden suntags nach Ostern.

Source Fulltext: PANGERL, Goldenkron (=FRA II/37, Wien 1872) S. 438