Frater Johannes abbas monasterii in Lanngkheym ordinis Cisterciensis Babenbergensis diocesis religioso et in Christo nobis dilecto fratri Conrado Kellner monacho sacerdoti et nostrae professionis filio carissimo salutem in domino sempiternam! Cum secundum sacrorum canonum sanctiones religiosus, cuius arbitrium non ex sua cum velle et nolle non habeat, sed ex illius quem vice dei supra caput suum posuit et cuius imperio se subiecit, voluntate dependet, electioni de se ad praelationem aliquam extra suum monasterium vel suam ecclesiam celebratae sui superioris qui dare ipsam valeat non petita licentia et obtenta praesumpserit consentire, consensus sit (sic, sic) praestitus non teneat et in poenam praesumptionis electio eadem ipso facto viribus vacuetur, et venerabilis in Christo pater dominus Adam coabbas noster in Plazz vivae vocis oraculo nobis insinuaverit, quod monasterio in Sancta Corona praefati nostri ordinis Pragensis diocesis sibi inmediate subiecto et tunc certo modo pastore suo destituto de tua persona per electionem canonicam per viam compromissi in se ut asserit facti providendum duxit, nobisque ex parte tua instanter supplicavit, quatenus praefatis electioni et provisioni dationem tibi licentiae consentiendi (et) nostrum praeberemus assensum. Ne igitur defectu licentiae nostrae praefata electio de tua persona ita ut praefertur facta irrita sit et inanis, vel certe viribus vacuetur, nos qui de tua promotione semper gratulamur, praefatam electionem dummodo alias rite canoniceque facta sit, ratam gratamque habentes, tibi ut in eandem libere consentire valeas, facultatem atque licentiam damus, sicut et dudum tibi eandem dedimus, teque in dei nomine a nostrae professionis vinculo absolvimus in hiis scriptis, quibus in testimonium praemissorum sigillum nostri abbatus appendi fecimus, die lunae et vicesima quinta mensis Junii, anno domini millesimo quadringentesimo octogesimo primo.

Source Fulltext: PANGERL, Goldenkron (=FRA II/37, Wien 1872) S. 533-534