Joannes miseratione divina tituli sanctae Sabinae sacrosanctae ecclesiae presbyter cardinalis, de Aragonia, et apostolicae sedis gratia legatus, universis et singulis Christi fidelibus praesentes litteras inspecturis, visuris, lecturis, pariterque audituris salutem in domino sempiternam! Cum cum propheta dicente dominum in sanctis eius laudare deceat, quia gloriosus deus in sanctis suis glorificatur, cupientes igitur, a toto nostro desiderio et effectu desiderantes, et etiam ad supplicationem et humilem requisitum (? requisitionem) dilecti nostri domini Michaelis in Poletiz presbyteri et parochialis ecclesiae sancti Nicolai in Boletiz rectoris, ut ipsa parochialis ecclesiae congruis frequentetur honoribus et a Christi fidelibus cum debita veneratione habeatur, ut luminaribus, libris, calicibus, fabricis et aliis ornamentis ecclesiasticis congrue fulciatur, et a Christi fidelibus praedictis cum debita veneratione habeatur, veneretur et augeatur ac aedificiis conservetur et manuteneatur, fidelesque ipsi eo libentius devotionis causa confluant ad eandem parochialem ecclesiam, et ad fulcimentum, conservationem, manutentionem et aedificationem huiusmodi manus promptius porrigant adiutrices, quo ibidem dono coelestis gratiae uberius conspexerint se refectos, de omnipotentis dei misericordia ac beatorum Petri et Pauli authoritate confisi, omnibus et singulis Christi fidelibus praedictis, qui dictam sancti Nicolai parochialem ecclesiam in diebus festorum eiusdem sancti Nicolai in anno occurrentibus, dedicatonis ipsius, festi sancti Procopii confessoris, et in eius filiali ecclesia¹ in dedicatione² sancti Martini annuatim ad fulcimentum et aedificationem huiusmodi manus porrexerint adiutrices, ut praefertur: nos pro singulis diebus quibus id fecerint, devote visitaverint ac in his diebus supradictis interfuerint, centum dies de iniunctis eis poenitentiis misericorditer et in domino relaxamus, praesentibus perpetuis et futuris temporibus duraturis. In quorum fidem et testimonium praemissorum praesentes litteras fieri iussimus, nostrique sigilli pendentis (sic, appensione) fecimus communiri in robur et testimonium praedictorum. Datum in civitate Crumloviensi, decimo quinto Novembris die, millesimo quadringentesimo, octuagesimo tertio, pontificatus sanctissimi domini nostri domini Sixti divina providentia papae quarti anno decime tertio.||
L. Aquilanus episcopus.

Source Fulltext: PANGERL, Goldenkron (=FRA II/37, Wien 1872) S. 538-539