Wir Wenczlaw von Gots gnaden Romischer kunig zu allen zeiten merer des reichs und kunig zu Beheim embieten dem || burgermeister, rate, burgern und ynwonern der state zum Dutschembrod unsern lieben getrewen unsz gnad und alles || gut lieben getrewen wann wir dem edlen Witichen von Lantstein, dem obersten camerer des kunigreichs zu Beheim, || unserm camermeister, rate und lieben getrewen die vesten Lipnicz und die stat Dutschembrod mit allen iren zugeho- || ringen von kuniglichen gnaden erblich und ewiclich gegeben voreygent haben, als das wol aussagen unsere andere || kunigliche brief, die wir ym doruber gegeben haben. Davon so weisen wir euch an denselben von Lantstein, seine erben || und nachkomen und heissen euch mit diesem brief ernstlich und festiclich und wellen das ye also gehabt haben, das || ir demselben von Lantstein, seinen erben und nachkomen fur euch und ewere nachkomen erblich und ewiclich als || ewern rechten erblichen und naturlichen herren huldet, sweret und gelowet das ir ym seinen erben und nachkomen || als ewerm rechten herren getrewe gehorsam undertenig gewartend sein sullet, als ir gen uns bis her getan hat. || Wann wir euch, so ir ym huldet, gelowet und gesworen habt, sulcher eyde domit ir uns vort als ewerm rechten herren || vorbunden wart, fur uns, unsz erben und nachkomen, kunige zu Beheim, genczlich und gar ledig und los lassen. Mit || urkunt dicz briefs besigelt mit unsz kuniglichen maiestat insigel. Geben zu Prage noch Crists geburt dreiczen- || hundert jar dornach in dem newnundsibencigsten jar an aller heiligen abenden unsz reiche des Behmischen in dem sibenczenden und des Romischen in dem vierden jaren. || Per dominum Thimonen de Coldicz. Martinus Snoymensis archidiaconus. ||

Source Fulltext: Gregor Patt