+ In nomine Domini. Vicesimo septimo anno principatus domni nostri Gisulfi gloriosi principis, mense martio sexta indictione. Ante me Petrum iudicem Risus clericus filius quondam Iaquinti clerici et medici coniunctus est cum Mansone Atrianensi filio Iohannis Atrianensis qui cognominatur Turoczu, et per ipsum Risum clericum ostensa est una cartula que continebat: Tricesimo anno principatus domni Guaimari principis et decimo anno ducatus illius Amalfis et Sirrenti et sexto anno principatus et ipsorum ducatuum suprascripti domni nostri Gisulfi eius filii eximii principis et ducis, mense decembri prima indictione. Qualiter ante Iohannem iudicem Iaquintus et Ademarius filii quondam Madelmi coniuncti fuerant cum suprascripto Riso clerico filio iamdicti Iaquinti clerici et medici et cum Purpura uxore illius filia quondam Ursi; et ipsi Iaquintus et Ademarius clarificaverant se habere terra cum insiteto in loco Transboneia ubi Maiulu dicitur per fines et mensuras iusto passu hominis mensuratas: a parte orientis finis ipsorum Iaquinti et Ademarii et per ipsam finem mensurati passus sexaginta; a parte meridiei finis ipsorum Risi et Purpure et passus sexaginta; a parte occidentis finis ipsorum Iaquinti et Ademarii et passus sexaginta. et sicut ipsis Iaquinto et Ademario congruum fuerat, bona illorum voluntate, per ipsam cartulam commutationis hordine tradiderant ipsorum Riso et Purpure integram suprascriptam terram cum insiteto per suprascriptas fines et mensuras cum omnibus que intro eam erant omnibusque suis pertinentiis et cum vice de via sua. ea ratione ut semper fieret in potestate ipsorum Risi clerici et Purpure et heredum illorum, et liceret illos et illorum heredes de eo facere quod volerent, sicut ipsa cartula continet, que scripta est per Petrum notarium et in ea ipsa Iohannes iudex subscriptus est. Cum autem ipsa cartula fuit ostensa, ipse Risus clericus clarificavit et dixit ut tota suprascripta terra cum insiteto per iamdictas fines et mensuras, quam ipsi Iaquintus et Ademarius sibi et suprascripte Purpure uxori sue commutationis hordine tradiderant, sicut suprascripta cartula continet, sibi esset pertinens et ideo, sicut ipsi Riso congruum fuit, sua voluntate, per convenientiam, per hanc cartulam venumdedit ipsi Mansoni Atrianensi filio memorati Iohannis Atrianensis qui cognominatur Turoczu totam et integram suprascriptam terram cum insiteto de suprascripto loco Transboneia ubi Maiulu dicitur per iamdictas fines et mensuras iusto passu hominis mensuratas, que et qualiter eam, ut dictum est, ipsi Iaquintus et Ademarius sibi et suprascripte Purpure uxori sue commutationis hordine tradiderant, sicut suprascripta cartula continet, cum omnibus que intro eam sunt omnibusque suis pertinentiis et cum vice de via sua et cum suprascripta cartula. ea ratione ut integram suprascriptam venditionem qualiter prescriptum est sit semper in potestate ipsius Mansonis et heredum eius et liceat illum et eius heredes de ea facere quod voluerint. et propter confirmationem huius venditionis ipse Risus dixit se suscepisset ab eodem Mansone statutum pretium auri tarenos bonos octoginta et octo, et nunc coram mea presentia suscepit a suprascripto Mansone alios quattuor auri tarenos bonos in omni deliberatione sicut inter eos convenit. et per convenientiam ipse Risus guadiam ipsi Mansoni dedit et fideiussorem ei posuit semetipsum, et per ipsam guadiam obligavit se et suos heredes semper defendere ipsi Mansoni et illius heredibus integrum illud quod ei ut dictum est venumdedit ab omnibus hominibus. ea ratione ut, quando ipse Manso et suos heredes ipsum Risum et illius heredes defensores de eo habere quesierint, tunc per omnes vices ipse Manso et suos heredes dent eidem Riso et illius heredibus suprascriptam cartulam iusta ratione salbam abendam per omnes vices diebus sexaginta, et tunc per omnes vices ipse Risus et suos heredes integrum illud predicto Mansoni et illius heredibus defendant sicut suprascriptum est; et post completos ipsos dies per omnes vices ipse Risus et suos heredes cartulam ipsam rationaviliter salbam qualem eis data fuerit illis retdant. et ipse Risus prebuit ipsi Mansoni licentiam ut, quando ille et suos heredes voluerint, potestatem habeant illud per se defendere qualiter voluerint cum omnibus monuminibus et rationibus quas de eo ostenderint. et si sicut superius scriptum est ipse Risus et suos heredes ipsi Mansoni et illius heredibus non adimpleverint et suprascripta vel ex eis quicquam removere aut contradicere presumpserint, per ipsam guadiam obligavit se et suos heredes componere ipsi Mansoni et illius heredibus triginta auri solidos constantinatos et sicut superius scriptum est adimplere. quod autem superius disturvatum paruerit legitur octoginta et octo. et ipse Manso hec omnia suprascripta fecit secundum legem et Romanorum consuetudinem. et quod inter virgulos scriptum est legitur ipse. Et taliter tibi Iohanni notario scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 09, 140-142, Estratto da ALIM