+ In nomine domini nostri Iesu Christi. Anno vero ab incarnatione eius millesimo septuagesimo primo et vicesimo nono anno principatus domni nostri Gisulphi gloriosi principis, mense augusto octaba indictione. Dum coram presentia domne Gemme principisse filie bone memorie Laidulfi comitis, que fuerat uxor beate recordationis domni Guaimarii principis et ducis genitoris suprascripti domni nostri principis, essem ego Sico comes et iudex cum aliis hominibus, tunc in eandem presentia Audoaldus comes filius cuiusdam Adelferii comitis coniunctus est cum Guaimario filio ipsorum domni Guaimarii et domne Gemme, et ipse Audoaldus ostendit unum preceptum utili anulo consignatum in hunc modum continens: In nomine Sanctæ et individue Trinitatis. Gisulfus divina favente clementia Langobardorum gentis princeps. Nostras ad Deum tendere pre[ces] confidimus si dignas petitiones nostrorum fidelium non contempnimus, et eosdem fideles nostro beneficio nobis fore credimus fideliores et in nostro servitio promtiores et ceteros ea que benefecerimus arbitratos fidelius nostris obedire preceptis. Idcirco per interventum domne Gemme principisse karissime genitricis nostre concedimus tibi Audoaldo comiti, dilecto parenti nostro, filio quondam Adelferii comitis, integram aquam de fluvio de loco Veteri et integrum albeum ipsius fluminis et integras ripas ex utraque partium a molino Romoaldi filii Iohannis vestararii et Petri notarii filii Mansonis descendente in partem meridiei usque ad finem rerum de heredibus Mansonis Atrianensis qui dicitur Orfanu, cum omnibus que intra illud sunt cunctisque eius pertinentiis et cum vice de via sua. ea ratione ut semper sit in potestate tua et heredum tuorum, et liceat te et tuos heredes de eo facere quod volueritis. et neque a nostris iudicibus, comitibus, gastaldeis neque a quibuscumque actoribus nostræ reipublice quolibet tempore tu et tui heredes habeatis ex hoc quod tibi concedimus aliquam contrarietatem, sed in perpetuum illud tu et tui heredes securiter habeatis et faciatis ex eo quod volueritis. Textum vero huius concessionis scribere precepimus te Aceprandum levitam et scribam nostri sacri palatii anno nobis a Deo concessi principatus quintodecimo, mense iulio concurrente indictione nona. Cum autem ipsum preceptum ostensum fuit, sicut ipsi Audoaldo congruum fuit, bona sua voluntate, per convenientiam, per hanc cartulam tradidit ipsi Guaimario pro parte suprascripte domne Gemme totum et integrum illud quod ipse domnus princeps prefato Audoaldo concesserat, quemadmodum supradictum preceptum continere dinoscitur, cum omnibus que intra illud sunt cunctisque suis pertinentiis et cum vice de via sua et cum suprascripto precepto. ea ratione ut semper sit in potestate ipsius domne principisse et heredum eius et illa et eius heredes licentiam habeant ex eo facere quod voluerint. et per convenientiam ipse Audoaldus guadiam ipsi Guaimario pro parte ipsius domne principisse dedit et fideiussorem ei pro illius parte posuit Ademarium comitem filium quondam Landolfi comitis, et per ipsam guadiam ipse Audoaldus obligavit se et suos heredes semper defendere ipsi domne principisse et illius heredibus integrum illud quod ipsi Guaimario ut dictum est tradidit ab omnibus hominibus, quibus per ipsum Audoaldum et eius heredes illud vel ex eo datum aut obligatum vel manifestatum seu alio quocumque modo alienatum paruerit et qui pro parte et dato ipsius Audoaldi et heredum eius quascumque causationes ex eo ipsi domne principisse et illius heredibus preposuerint; et ipse Audoaldus tribuit ipsi domne principisse licentiam ut, quando illa et suos heredes voluerint, potestatem habeant illud per se defendere qualiter voluerint cum omnibus muniminibus et rationibus quas de eo ostenderint. et si sicut superius scriptum est ipse Audoaldus et suos heredes ipsi domne principisse et illius heredibus non adimpleverint et suprascripta vel ex eis quicquam remobere aut contradicere presumpserint, per ipsam guadiam ipse Audoaldus obligavit se et suos heredes componere ipsi domne principisse et illius heredibus centum auri solidos constantinatos et sicut superius scriptum est adimplere. Et taliter tibi Iohanni notario scribere precepi. S. + Ego qui supra Sico comes et iudex.

Source Fulltext: Codex Diplomaticus Cavensis, vol. 09, 295-297, Estratto da ALIM