Gregorius episcopus servus servorum Dei. Omnibus Christi fidelibus clericis ac laicis, salutem et apostolicam benedictionem. Notum esse volumus omnibus clericis ac laicis Deum pia catholicaque fide colentibus nos in apostolice defensionis tutelam Cavense monasterium suscepisse quod apud Salernum in sancte et individue Trinitatis honore constructum esse dinoscitur, cui monasterio nos quedam in Cilento monte posita monasteria, videlicet monasterium Sancte Marie de Gulia, monasterium Sancti Nikolai, Sancti Archangeli, Sancti Magni, Sancti Fabiani, Sancti Georgii, Sancti Mathei ad duo flumina et ecclesiam Sancti Angeli de Monte Corice, Sancti Blasii de Butrano, Sancti Iohannis de Terresino, Sancti Salvatoris de Nuce, Sancti Zacharie de Lauro cum cellis eorum iure perpetuo possidenda atque regenda et secundum Deum ordinanda venerabili Petro abbati eiusdem monasterii karissimo filio nostro Gisulfo principe concedente olim donavimus, et nunc eidem abbati eiusque successoribus ad regendum, corrigendum et procurandum ipsa committimus et auctoritate apostolica confirmamus. interdicimus igitur in nomine domini nostri Iesu Christi et ex auctoritate beati Petri apostolorum principis, cuius vice Sancte Romane Ecclesie presidemus, et omnino prohibemus ut nullus archiepiscopus aut episcopus, nullus regum, ducum, principum, comitum, nullus crericorum, laicorum aut quelibet omnino magna vel parva persona prefato Sancte Trinitatis cenobio in predictis monasteriis vel ecclesiis cunctisque ad ea pertinentibus quocumque modo seu qualibet occasione aliquid minuere vel dolos vel molestias aut aliquam violenciam inferre aut Dei servos inquietare punienda temeritate presumat, quatinus Romane soli Ecclesiæ idem monasterium cum prefatis ecclesiis pleno iure videatur esse subiectum; tanto enim religiosi monachi ibidem Deo servientes sinceriori mente divinum opus exequi devotissime poterunt quanto nos eorum quieti nostra immo beati Petri apostolorum principis auctoritate per omnia providere studemus. si quis vero adversus predictum monasterium iustam se putat habere querelam et aput cenobii abbatem vel monachos litem suam decidere ac diffinire voluerit, volumus atque edicto perpetuo statuimus ut ante nos vel legatos nostros querimonia deferatur, quatinus equitate iudicii sine personarum acceptione sua unicuique iusticia Deo auctore servetur. si quis autem contra hanc nostri decreti auctoritatem ire temptaverit, sciat se beati Petri apostoli gratiam amissurum et apostolice indignacionis ulcione feriendum; obedientes vero et huius pagine precepta servantes dignam a Deo retribucionem accipiant et apostolicam benedictionem consequantur. LS

Source Fulltext: Codex Diplomaticus Cavensis, vol. 10, 77-78, Estratto da ALIM