+ IN NOMINE SANCTE ET INDIVIDUE TRINITATIS. GISULPHUS divina favente clementia longobardorum gentis princeps. Quoniam sancte matris ecclesie universi orbis statum regitur dicione et ipsius dominatores illius rectorum precibus gubernantur, Condecet nos curam et sollicitudinem circa veneravilia loca diligenciam habere coequissimo retributore remunerante et nostra dominatio perletetur et a deo nobis concesse patrie populis gubernetur. Idcirco per interventum domne Gemme principis nostre et per postulationem tuam o benerabilis Leo abbas et monache monasterii sancte et inseparabilis Trinitatis foris hac civitate constructi in loco qui nominatur metilianum, spirituali patri nostro, Concedimus et confirmamus in ipso monasterio integram terram cum vineis et arbusta et insiteta et vacuo in qua et ipsum monasterium edificatum est que est per fines: De una parte est finis medius vallone quod giniolum dicitur in quo arcora antiqua fabricata sunt, qualiter incipit a fluvio qui factus est ex aqua niblonis et aqua alte et vadit per ipsum vallonem et coniungit in rerum metilianensium hominum in eodem loco ubi appacclu dicitur. et ab ipso vallone vadit in parte meridie secus ipsam finem ipsorum hominum sicut termini fixi sunt usque viam publicam et per ipsam viam vadit in medium vallonem qui saxu vibu cognominatur. Et per medium ipsum vallonem descendit in medium ipsum flubium nibbonis, et per medium ipsum descendit et coniungit cum ipsa aqua alta qualiter coniungit cum ipso giniolo vallone. Et integram terram cum vineis et insitetis et castanetis et silvis que sunt in plaio montis in qua ecclesia sancti michaelis archangeli que ipsi monasterio pertinet constructa est, que est per fines: A parte occidentis est finis vallonis qui salani dicitur qualiter incipit ubi ipsa aqua niblonis coniungitur cum ipsa aqua alta, et ascendit per ipsum vallonem usque in locum ubi aqua alta dicitur, et abinde ascendit per medium vallitellum per quod aqua fluit usque lapideam criptam que in latere montis facta est et ab ipsa cripta descendit in vallitellum secus cilium magnum lapideum in vallitellum et abinde ascendit per alium magnum lapideum cilium et coniungit in media serram montis que est serra ubi capuaque dicitur; et ab ipso cilio descendit per mediam serram et turella, et ascendit mediam serram montis qui dicitur cerasulu, et descendit per mediam ipsam serram et coniungit in aream que dicitur dompnica, et abinde descendit per medium torum quod castaniola dicitur et per medium vallitellum descendit et coniungit in medium ipsum vallonem qui est supter ecclesiam sancti archangeli quam ipsi monasterio olim donavimus in loco pasciano; et per medium ipsum vallonem descendit et coniungit cum ipso fluvio, et per ipsum flumen ascendit et coniungit in eo loco ubi ipsa aqua alta coniungitur cum ipsa aqua niblonis. Ea ratione ut integras suprascriptas terras in suprascripto monasterio concedimus et confirmamus cum omnibus que intra eas sunt et cum ipsis ecclesiis et cunctis earum pertinentiis et cum vice de viis earum, et cum integris ambabus fluminibus cum omnibus ripis ex utraque parte quantum ex eis cum suprascriptis terris coniuncte sunt et cum omnibus rebus mobilibus ipsius monasterii et iamdicte ecclesie pertinentibus; Ut semper sint in potestate tua Leonis abbatis et successorum tuorum et partium ipsius monasterii ad faciendum de eo quod volueritis. Et confirmamus in eodem monasterio integras res quas salpertus qui postea monachus ipsius monasterii factus est et iohannes filius quondam petri qui cognominabatur sclassenatus et gemma filia machenolfi uxor iohannis filii quondam landoni et machenolfus filius ipsorum gemme et iohannis de suprascripto loco metiliano habitatores olim per firmas cartulas in eodem monasterio optulerunt, et integras omnes res quas per quemlivet modum ipsi monasterio ubicumque sunt pertinentes et erunt et quas tu paratas habes et successores tui et partes iamdicti monasterii a quibuslivet paraturi sunt et quas alii homines in suprascripto monasterio dederint per qualemcumque modum similiter confirmamus sive demania sive feudalia fuerint tam in vassallis quam in terris stabilibus sive mobilibus et quod de ipsis feudalibus aut demaniis oblatis et offerendis nullum servicium reipuplice vel alteri tu et successores tui et partes iamdicti monasterii facietis, set semper sint in potestate tua et successorum tuorum et partium ipsius monasterii ad faciendum ex eis tu et successores tui et partes ipsius monasterii quod volueritis. Confirmamus insuper in eodem monasterio integras terras quas retinetis foris hanc cibitatem in loco calcarola ut semper sint in tua et successorum tuorum potestate et partium ipsius monasterii cum omnibus que intra eas sunt cunctisque earum pertinenciis et cum vice de viis earum, ad faciendum ex eo quod tu et successores tui et partes ipsius monasterii volueritis. Et concedimus in ipso monasterio ut tu et successores tui et pars ipsius monasterii in suprascripto fluvio et in ripis eius et in aliis albeis fluminum que cum terris ipsius monasterii coniuncte sunt et fuerint, tam in his que nunc habetis, quam in his que habebitis in futurum, potestatem habeatis palos figere et ante posiciones, et molina, et trappita pro olivis, et calcarias et edificia facere, et fodere, et ipsos albeos per ipsas res ipsius monasterii mutare qualiter volueritis, quoniam talia nullus sine mandato nostre reipublice audet facere seu habere potest in nostro principatu. Concedimus etiam ad honorem sancte Trinitatis ipsius monasterii et reverentia sanctitatis tue pater Leo abbas et amore dompni Alferii qui fuit pater noster spiritualis et abbas iamdicti monasterii, atque propter remissionem peccatorum nostrorum et domne Gemme principis nostre et Wamarii filii nostri ut omnes homines qui habitant sive habitaverint in Castello sancti Adiutoris et pertinentia eius, et in locis pasciano, metiliano et pertinenciis earum, et in transbonea quam a nobis tenet nibus bisconte, et in loco albole, cetare et fontis, omnia tributa, pensiones, angarias et perangarias, tam pro terris quas tenent intra fines inferius distinctas, quam pro personis eorum, atque salutes quas nostre camere sive pro terris quas laborant iuxta ritum regionis vel dominii ratione pro quolivet foculari dare et persolvere debuerint totas tibi tuisque successoribus dent et exolvant in perpetuum remota omni nostra contradictione. Qui fines incipiunt a medio vallone quod gallocanta et petralena dicitur prope quem monasterium sancti nicolai ipsi monasterio pertinens situm est; et vadit in parte occidentis secus mare usque medium fluvium qui dicitur cetara et qualiter ab eo loco quo ipse fluvius cum mari iungitur ascendente recte usque medias serras altium montium qui discernunt fines amalfitanorum, et per medias serras ipsorum moncium ascendent in parte septemtrionis usque in montem qui dicitur capraricus qui est desuper locum ubi fenestra dicitur et a cacumine ipsius montis caprarici vadit iterum in eamdem partem septentrionis per medias serras usque ad fines nucerinorum. Ab ipsa parte septemtrionis finis ipsorum nucerinorum qualiter descendit per medium vallonem qui est ultra et non multum longe in ipsa parte septemtrionis a monte in quo ecclesia sancti martini ipsi monasterio sancte Trinitatis pertinens constructa est usque ad viam puplicam que ducit nuceriam, et transgrediendo ipsa via vadit in parte orientis secus terram cum arbustis ipsi monasterio pertinentis in locum qui dicitur sapiola et ab ipsa terra cum arbustis vadit usque vallonem qui dicitur foruncla, et per medium ipsum vallonem ascendit in parte orientis usque mediam serram que dicitur aira fabrita, et per ipsam serram et per alias serras aliorum montium vadit in parte orientis usque serram montis qui dicitur decemari qui est de super rocca que dicitur, de amata. et exinde vadit ad verticem montis qui dicitur de cannitello, et a vertice ipsius montis de cannitello vadit et ascendit in serram montis qui dicitur corvarus; et ab ipsa serra descendit in parte meridiei usque in caput alius montis qui dicitur de fossa lupara in qua olim castellio fuit. et a capite ipsius montis usque ipsum vallonem qui de gallocanta et petralena dicitur, descendit in mare usque priorem finem. Quod quidem tenimentum cum omnibus suis pertinentiis et cum vice de viis earum bona fide promittimus donare sancte Trinitati et tibi Abbas Leo patri nostro spirituali et successoribus tuis, et ex nunc te et ipsum monasterium de ipsa promissione investimus per nostram virgulam quam in manu tenemus sicut nobis ipsa sancta trinitas inspiravit per suam gratiam et misericordiam, quod incontinenti dato ex cambio Tudentino nostro manescalco, qui castrum sancti Adiutoris predictum nunc a nobis tenet et viboni bisconti predicto pro Trasbonea ipsum Totum Tenimentum per fines suprapositos quantum ad nos pertinet cum toto predicto Castro sancti Adiutoris et eius pertinentia tibi iamdicte Leo Abbas et tuis successoribus per nostram aliam cartam solemniter donabimus, et amodo predicto Tenimento tu et successores tui et ipsum monasterium et de hominibus morantibus et moraturis intra ipsum dominaberis, et exigas, et recipias ab eis omnibus predictos redditus et partem fructuum de terris quas laborant tam de super quam de subtus, sicut faciunt alii de contrata, et usque nunc ipsi nostre camere persolverunt, excepta fortellicia tantum iamdicti castri; nulla nobis in ipso Tenimento et in hominibus intra ipsum morantibus sive commoraturis iurisdicione sive potestate reservata aut successoribus nostris non solum in ipsis set in omnibus aliis quos habebitis in futurum ubicumque per nostrum principatum nichil nobis reservamus et successoribus nostris sive demanii sive feudales fuerint aut donati aut oblati fuerint. Et concedimus in eodem monasterio, ut omnes liberi homines quando ad habitandum in res ipsius monasterii intraverint et sui vassalli esse voluerint, nullum censum, angariam, seu pensionem partibus nostre reipublice faciant, sed quicquid nostre reipuplice persolvere debuerint, tibi et successoribus tuis et partibus ipsius monasterii dent et persolvant, aut portaticum in nostro principatu vel plateaticum, et in hac cibitate dent. Tamen si vendiderint aliquid et emerint quam et illis qui et ab ipso monasterio et ab eis emerint, seu quocumque modo acceperint. Et concedimus in ipso monasterio omnes res mortuorum et sine heredibus moritororum quecumque rebus ipsius monasterii coniuncte sunt et fuerint; ut tu et successores tui et pars ipsius monasterii semper eas securiter habeatis ad faciendum quod volueritis de ipsis. Et concedimus in eodem monasterio quociens abbatem ex eodem defecerit defecerit non ab aliquibus personis abbatem ibi ordinetur; Sed semper monachi ipsius sacri monasterii licentiam habeant, ex ipsa congregatione eligere et abbatem secundum statuta sancti benedicti regula in ipso monasterio hordinare. Et si quolivet tempore acciderit ut pars ipsius monasterii sacramentum cuilivet homini persolvere debeat de aliquibus rebus, non ab abbatibus nec monachis ipsius monasterii sacramenta ipsa persolvantur; Sed scariones ipsius monasterii sacramenta ipsa persolvant. Et confirmamus in eodem monasterio integras res que ipsi monasterio concessa sunt foris hac cibitate in loco tusciano intra quas ecclesia sancti micahelis archangeli constructa est, et omnia alia que per principes antecessores nostros concessa et data fuerunt in ipso monasterio. Ea ratione ut hoc totum quod suprascriptum est in prefato monasterio concedimus et confirmamus, semper sint in potestate tua et successorum tuorum et partium ipsius monasterii ad faciendum ex eo quod volueritis tu et successores tui et partes ipsius monasterii. Et neque A nostris iudicibus, comitibus, Castaldeis neque a quibuscumque nostre reipuplice quolivet tempore Tu et successores tui et pars iamdicti monasterii habeatis ex hoc quod in ipso monasterio sicut suprascriptum est concedimus et confirmamus aliquam contrarietatem; Sed in perpetuum illud securiter habeatis sicut predictum est. et faciatis ex eo quod volueritis. Textum harum concessionum et confirmationum scribere precepimus Te aceprandum levitam et scribam nostri palatii sacri Anno nobis a deo concessi principatus Sicilie, Calabrie, et Ytalie septimodecimo. Quod autem disturbatum legitur tui et super fluvium in vallitellum. MENSE AUGUSTO CONCURRENTE INDICTIONE UNDECIMA. Locus + Sigilli.

Source Fulltext: Codex Diplomaticus Cavensis, vol. CDC.008, -, Estratto da ALIM