+ In nomine domini vicesimo secundo anno principatus domni nostri gisulfi gloriosi principis, mense iunio, prima indictione. Ante me petrum iudicem Adelarius filius quondam romoaldi coniunctus est cum leone filio quondam constantini, qui dictus est cancellaru. Et ipse adelarius clarificavit sivi pertinere terram cum biscilietum foris hac civitate in plaio montis qui est ulter et a super fluvium per quod fluit acqua que dicitur boneia, ubi proprio ad traverse dicitur, quam dixerunt esse per fines et mensuras iusto passu hominis mensuratas. A parte orientis est finis via antiqua que ducit inter hanc et alteram terram pertinentem ipsius adelarii, et passi quadraginta quattuor. A parte septemtrionis est finis terra cum biscilietum ipsius leonis quam ei dudum ipse adelarius per firma cartula venumdedit, et mensurati qualiter ascendit passi sexaginta. A parte occidentis est finis ipsius adelarii, et passi decem. A parte meridiei finis similiter ipsius adelarii, et mensurati qualiter descendit passi alii sexaginta usque suprascriptam viam. Et sicut ipsi adelario congruum fuit bona sua boluntate per hanc cartulam per combenientiam venumdedit ipsi leonis integram suprascriptam terram cum biscilietum per suprascriptas fines et mensuras cum omnibus que intro eas sunt cunctisque suis pertinentiis et cum vice de ipsa via. Ea ratione ut integra suprascripta venditio, qualiter prelegitur, sit semper in potestate ipsius leonis et heredum eius, et liceat illum et eius heredes ex ea facere quod voluerint. Et propter confirmationem uius venditionis ipse adelarius suscepit ab ipso leone statutum pretium auri tarenos viginti et quinque in omni deliveratione. Et per combenientiam ipse adelarius guadiam ipsi leonis dedit et fideiussorem ei posuit landolfum filium quondam marii. et per ipsam guadiam obligavit se et suos heredes semper defendere ipsi leonis et illius heredibus integram suprascriptam venditionem ab omnibus hominibus: Et ipse Adelarius tribuit ei licentiam, ut quando ipse leo et suos heredes voluerint, potestatem habeant suprascriptam venditionem per se defendere, qualiter voluerint, cum omnibus muniminibus et rationibus quas ex eo ostenderint. Et si, sicut superius scriptum est, ipse adelarius et suos heredes ipsi leonis et illius heredibus non adimpleverint, et suprascripta vel ex eis quicquam remobere aut contradicere presumpserint, per ipsam guadiam obligavit se et suos heredes componere ipsi leonis et illius heredibus triginta auri solidos constantinos. et sicut superius scriptum est adimplere. Et taliter tibi iohanni notario scribere precepi. + Ego qui supra petrus iudex.

Source Fulltext: Codex Diplomaticus Cavensis, vol. CDC.008, -, Estratto da ALIM