Ich Stephan Pursing chiricherr zu Möring und zu purchchausenvergich offenleich mit dem brief||
für mich und all mein nachkomen daz ich got zw lob und unser lieben frawen versprochen han||
ze singen tägleichen vor dem fron ambt ain Salve regina oder ain ander antiphonam dafür||
zw den zeitten als man sy dan ordenleich nach unsers pistum und der pfarr hye gewanheit singen||
ist und darzw sol von ainem priester ein collecten von unser frawen gelesen werden||
und zw der selben antiphonam hat der Erberg man Cristan Wettinger Im und sein vodern||
zu ainem selgerat weichcleich geben und gemacht in den pfarrhof inne meinen gesellen||
Capplan und schulmaister zehen schilling wyenner geltz auf seinem haws und hofstat||
daz gelegen ist zwischen Aher und hannsen dez wolf häwser dar umb ein pfarrer||
wol pfennden mag alz hof zins recht ist hin für als oft man im den zins nicht||
ausricht halben auf sant Jörgen tag und halben auf sant Michels tag Auch verpint||
ich mich hin wider daz ich und all mein nachkomen trewleichen an abgang wellen||
volbringen daz selb Salve regina oder antiphonam und kann ich daz uber füre daz es||
versäwmet wurde so hat sich als oft sy versäwmet wirt ain vierdung wags gen sant||
Jacob dem zechmaister veruallen und dez alles zw urchunde gib ich im dem obgeschri||
ben Christian Wettinger den brief versigelten mit meinem anhangenden Insigel alles daz||
stät zu halten daz oben geschriben stetdaz ist geschechen da man zalt von Cristes||
gepurde vierzehen hundert jar und darnach in dem Sibenten Jar an sant Jörgen tag

Source Fulltext: Joannis Beinhölzl im Rahmen der Übung "Digitale Urkundenedition" an der LMU, Leitung: Georg Vogeler, Sommersemester 2009