Ich Gozwein von Waltchouen vnd mein hausfrawe vnd mein erben vergehen vnd tuen chunt allen den, die disen prief :I ansehent, horent oder lesent, daz wir ze chauffen haben gegeben ze durchsl/acht vnser aygen gelegen ze Waltchouen, besuecht vnd vnbesuecht, dem spital ze Regenspurch, daz gelegen ist an dem fuezz der prukk, vmb fumfzehen pfunt Regenspurger pfenning, der si vns gar vnd ga'nczlich habent gewert. Wir haben auch in dazselb aygen bestætt mit vnsers salmannes hant, graf Alrams von Hals, vnd haben auch in ze purgen gesecz zu vns vnuerscheidenlich Albrechten den Wegær von T/omling vnd Chunrat seinen /oheim, Altmans s/un von Puech, daz vorgenant aigen ze versten vnd ze versprechen als lantz vnd aygens recht ist, vnd daz sich auch vnsereu chint verzeihen schulen, diu ze iren iaren nicht chomen sint, als si ez getu'n m/ugen. Dez sint zeug: her Heinreich von Schutenhou'n, her Vlreich dez spitals chapplan, bruder Chunrat der chelnær, her R/uger der alt richter, Chunr(at) der Riutlær, Heinreich der Schirlinger, Fridreich der scherg vnd andrer frumen la/ut genunch. Darvber ze einem vrch/und vnd ze einer stætichait geb wir dem vorgenanten spital disen prief mit hern Albrecht dez Viechofers, richters in der vorstat, insigel versigelten, wan wir selber nicht aygens insigels haben. Der prief ist gegeben do von Christes gepurt waren ergangen drevzehenhundert iar darnach in dem achtzehentem iar dez næhsten freitags vor pfingsten.