Ich Heinr(eich) von Erlkaim, vicztum z*u Amberg, vergich vnd t/un k*unt offenbar :I an disem brife, daz der ersam man, pruder Rupeht von des spitals wegen ze Regenspurch, vor mir auf dem lantgriht ze der Newm/ul bei Amberg an behabt hat mair Heinr(eich) von Swartenuelt, das halbe erbe auf dem hofe ze Swerczenvelt, mit volge, mit frag, mit vrtail vnd mit dem rehten, als reht ist. Es sol auch furbas dhein brife, swer di zeigt oder forbringt, vmbe daz erbe, dem vorgenanten spital von Regenspurch dhein schade sein, weder von mair Heinr(eich) noch von sinen erben. Ich sol auch das vorgenant spital darz*u sch*uczen vnd schirmen oder swer nach mir meiner herren amptman wirt, swer si daran hindert oder irt. Daruber z*u vrch*unde gibe ich im disen brife von gerihts wegen mit des lantgrihts insigel versigelt, der geben ist an dem montag vor sendt Lorencen tag anno domini millesimo trecentesimo quadragesimo primo.