Ich Hainrich der Ma'vschendorfa'r, Fridrich mein svn, Chvnrat mein svn, junchfraw Ch/vngunt mein :I tochter vnd all mein erbn vergehen vnd t*un chvnt alln den, di disen prief sehent, h/orent oder lesent, daz wir mit verdachtm m*ut vnd mit g*utem willn vnser g*ut dacz Ravach, daz vnser lieber vater her Vlrich von Ma'vschendorf, dem Got gnad, durch daz hail seiner sel hat geschafth dem spital miner fravn sand Katerin, an dem f*uzz der prukk ze Regenspvrch, daz wir dazselb g*ut dvrch vnserr vodern selhail vnd auch durch vnserr aller selhail dem vorgenanten spital ledich habn lazzn, gor vnd ga'nczlich aller der rechten vnd aller der ansprach, di wir heten auf demselben g*ut, also, daz wir noch all vnser nachch/ommen auf dazselb g*ut nimmermer chain ansprach sch/vlln haben vnd daz man vns auch f/urbaz nimmermer dhainnerlai dinst ist gepvnden ze dinen von dem vorgenanten g*vt. Daz daz also sta't vnd gancz weleib, dar/vber gebn wir dem vorgenanten spital disen prief z*v ainem vrch/vnd, versigelten mit hern Dietrichs insigel von der Ch/vrn vnd mit minem insigel, hern Hainrichs von Ma'vschendorf, vnd mein vorgenant erbn verpindn sich vnder minem insigel pei iren trewen ze laisten als daz, daz hie vorgeschriben stet. Dez sint zevg: her Ludwich von Wvnczhaim, her Vlrich von Nevnburch, her Chvnrat der Zengner von Nevnburch, Chvnrat der Wilnhofer, Hainrich der Schercza'r, pvrger ze Nevnburch vnd ander fr*vmer levt gen*unch. Der prief ist gegewen ze Nevnbvrch do von XPI (=Christi) gepvrt warn ergangnen drevzehenhvndert jar vnd darnach in dem sechsvndzwainzigstem jar an dem mychen vor mitterrvasten.