Ich R/uger der Pad/ar, ich Alhait sein Hawsfraw, purger in der vorstat ze Regens(purch), veriehen vnd tun chunt allen den, di den :I brif ansehent oder h/ornt lesen, daz vns her Albrecht von Zeidlorn, zu den zeiten maister dez spitals sand Katrein an dem fuzz der prukk ze Regens(purch), vnd der conuent doselben, verlihen vnd lazzen habent, ir vnd irs spitals aignew padst/uben, di gelegen ist ze nochst bei irem spital an dem Graben, mit allew dew vnd durch recht darzu geh/ort, zu vnser zwain leiben, fridleichen vnd freileichen ze besiczzen vnd inn ze haben, diweil wir paidew leben oder vnser ains nach leibtingzrecht, mit der beschaiden, daz wir in vnd irem spital wochenleichen von der egenanten padstuben ze zins geben s/ull viervndzwainczig Regens(purger) pfenning ye an dem s/unntag, on allen abganch, pfenning di dann gib vnd geb sind ze Regens(purch) in der stat, vnd in yedem jar vier hochzeit nach alter gewonhait, ze weichnachten ein achtail gutz welisch wein vnd zehen pfeninch semel, ze ostern als vil, ze pfingsten als vil vnd an sand Haymeramstag als vil, on allen abganch, t/aten wir dez nicht vnd zu welher zeit wir daran sa/wmich w/arn, daz wir in den zins vnd di hochzeit nicht g/aben vnd berichten, ye als offt sullen wir in den zins vnd di hochzeit darnach in den nochsten acht tagen geben mit der zwispild, on allen chrieg vnd widerred. Wir s/ullen auch ynner zwain jarn di nochst nacheinander choment, sechs pfunt Regens(purger) pfenning auf di vorgenanten padstuben pawen vnd zymmern, mit wizzen eins spitalmaister der ye dann ist, vnd f/urbaz sullen wir di padstuben j/arleich pawen vnd pezzern mit dach, mit n/vschen, mit estreich vnd mit aller notd/urfft, wo ir dez not ist, on iren vnd irs spitals schaden. Wir sullen auch allen zewkch vnd allew notd/urfft der wir bed/urffen, padlachen, p/olster, schalaun vnd schaf, wie daz allez genant ist, selb haben vnd besorgen, on allen iren vnd irez spitals schaden. Wir s/ullen auch mit dem obern hawslein vnd mit dem pawmg/artlein, vnd mit dem mulhaws nichtz ze schaffen haben, weder wenig noch vil in dhainerlay weis, on daz gewelb vnder der grozzen abziechstuben vnd vnder dem m/ulhawslein, daz sullen wir halbs haben, on allew hindern/uzz. Wir sullen auch in der padstuben nyemant behalten, weder pei tag noch bei nacht mit vnsrer wizzen, der dem spital vnd den d/urfftigen schedleich sei, vnd ob wir daz /vberf/urn, so sei wir geschaiden vnd geuallen von allen den rechten, di wir von in an der egenanten padstuben haben, on all widerred. Wir sullen auch den chapplan, di pruder vnd di frawn paden nach alter gewonhait, dann daz si den dien/arn lonen s/ullen, wir sullen auch di arm d/urfftigen paden nach alter gewonhait ye vber vierzehen tag als vorher chomen ist, on allew irrung vnd hindern/uzz, vnd darvmb sol man vns geben ye einen spitallaip vnd den s/ullen wir tailen nach alter gewonhait, vnd so sol der syechmaister ye als offt geben, viervndzwainczikch Haller den chnechten, die di d/urfftigen hincz pad vnd davon tragen. Vnd wann der maister padet mit seinen pr/obsten, schreibern vnd dien/arn, so sol er nicht mer ze lon geben dann sechs Regens(purger) pfenning, padent aber gest mit im, so mag er lonen nach seinen ern. Vnd ob ich obgenanter R/uger der pader vnd ich Alhait sein hausfraw oder vnser ains daz dann lebt, wolten oder m/usten vnserew recht verchumern, verseczzen oder verchauffen, an der egenanten padstuben, daz sol geschehen mit eins maister, wer dann maister ist, wizzen, willen vnd gunst, w/ar aber, daz vnser ains oder wir pedew so chrankch w/aren, daz wir di padstuben von chrankchait wegen nicht verwesen m/ochten, so m/ugen wir einen andern pad/ar an vnser stat stellen, der der padstuben nuczz vnd gutz sei, vnd daz sol auch geschehen mit eins maister willen vnd gunst. Man sol auch wizzen daz wir hinder vns nach vnserm tod auf der egenanten padstuben lazzen s/ullen, ze dem ersten einen chessel der zwair pfunt Regens(purger) pfenning wol wert sey, f/umf padt/ucher, aynlef polstar, zwelf potigen, sibenzehen (ziechschaf ?), in allen den ern als wir ez darinn funden haben; vnd si m/ugen auch dez allez mit sambt irem zins vnd hochzeiten, waz wir in dez vers/azzen, bechommen, wie si wellent, von vns vnd von aller vnsrer hab vor allen l/auten. Vnd wann wir obgenant leib paid nicht mer ensein, so ist in vnd irem spital di egenant padstub vnd waz darzu geh/ort ze durchslecht ledig worden, daz furbaz von vnsern wegen darauf nyemant nicht zu sprechen hat, weder wenig noch vil. Dar/vber zu vrch/und geben wir in den brif versigelt mit hern Otten dez Woll/ar, zu den zeiten schulthaizz ze Regens(purch), insigel, daz er an den brif gelegt hat nach vnsrer vleizzen pet, der sach zu einer gezeukchn/uzz, im vnenkolten, darvnder wir vns verpinden mit vnsern trewn st/at ze halten, waz an dem brif verschriben ist. Der sach sind teidinger gewesen: her Hainr(eich), der pfarrer zu Saler, her Wolfhart, der chapplan, Liebhart vnd Peter, di pr/obst vnd Ott der Elmawer, hofmaister in dem spital. Daz ist geschehen nach Cristi gepurtt dreuczehenhundert jar vnd in dem sibenczgisten jar, acht tag vor dem awffirtt tag.