Nos humilis magister et provisor hospitalis sancte Katherine in :| pede pontis Ratispone unversis ad quos presens scriptum pervenerit, salutem in eo, qui est salus omnium et vita. Noverint cuncti fideles Christi hanc veram esse indulgenciam hospitali nostro concessam a tribus summis pontificibus Romanorum et a centum pontificibus, a quolibet quadraginta dies criminalium et octuaginta venialium dies peccatorum, summa criminalium quatuor milia, summa venialium octo milia, terciam partem venialium peccatorum, unam karrinam et duas annales ieiuniorum, offensas patrum et matrum, que non fuerint enormes, execuciones peregrinancium, quas infirmitas, paupertas seu inimicicie impediunt estimatis laboribus et expensis ibidem per elemosinam sunt redimende; fractiones votorum, peccata oblita, iuramenta in ira perpetrata ibidem in domino misericorditer relaxantur. Numerus infirmorum et sanorum, quos dictum pascit hospitale trecenti et quinquaginta, numerus vero mortuorum hoc anno in ibidem sepultorum trecenti et amplius, quod miserabile est dicendum ; summa missarum, que in nostra domo per anni circulum celebrantur mille misse, in quibus missis largitores elemosinarum habent plene porcionem.