Ich Peter von Wansidel, ze den zeiten maister dez spitals sand Katherein an dem g/uzz der prukk ze Regenspurch vnd /vberal gemeinlich di pr/uder vnd di sampnung daselben, veriehen f/ur vns vnd fure vnser :I nachkomen vnd bechennen offenlichen an dem brif allen den, di in ansehent oder h/orent lesen, daz wir mit gemeinem rat vnd mit veraintem willen von vnsers spitals wegen vnd nach rat vnd gutem wellen vnd gunst der erbergen vier herren von dem chor ze Regens(purch), hern Chunratz von Heimberch, t/umprobst vnd zu den zeiten genediger pfleger vnd verweser im geistlichen vnd in werltlichen sachen vnd rechten dez pist/umes ze Regens(purch), hern Andre dez Guster, hern Ch/unrat dez Ettenstater vnd hern Ch/unrat dez Hofer vnd der erbergen vier herren von dem rat der stat z/u Regens(purch), hern Diepolt dez Vesler, hern Otten dez Graner, hern Stephan dez T/undorffer vnd hern Heinrich dez Porttner, di all /achtt ze den zeiten /vber vns ze pflegern vnd verwesern gesetzzt sint, vnser weing/artten der sechs rieb sind vnd nicht mer, die gelegen sind oberthalben Winczzer vnd di zu den zeiten gep/aut habent Ch/unrat der M/ulner, Vlreich der M/adelher vnd Leukart di Maderinn ein witib, all von Winczer, vnd diselben sechs rieb gent nach der leng von der strazz hinauf vncz an den ain vierst vnd ligent zwischen der zwair weing/artten, der ainer genant ist der Prunn weingart, der gen Oberm/unster geh/ort vnd der ander ist genant, der Weintinger vnd geh/ort in di Gustren hintz dem T/um, vnd di obgenanten sechs rieb mit allen iren rechten, n/uczzen vnd g/ulten, di davon ch/omen m/ugen haben wir f/ur ein lediges, rechtz aigen rechtt vnd redlichen ze durchslechtt verchauftt vnd geben alz chauffes recht ist dem ersamen mann herm Chunr(ad) dem H/adrer seiner hausfrwn vnd allen iren eriben vnd nachkomen, burgern ze Regens(purch) vmb sibenthalbez vnd achtzikch pfunt Regens(purger) pfenning der si /vns mit bereiten pfennigen gar vnd gentzlichen verrichtt vnd gewert habent an allen vnsern schaden vnd di wir dem spital ze notd/urft angelegtt haben. Wir haben auch si der vorgenanten sechs rieb vnd aller der n/uczz, di davon chomen m/ugen, gewaltig getan vnd geseczzt, vnd seczzen auch sy, der mit dem gagenwurttigen brif in n/uzz vnd in gewer, daz si vollen gewalt habent damit ze handeln, ze t/un vnd ze lazzen swaz si wellent alz mit anderer irer aygen hab an allen chrieg vnd widerred. Wir verzeihen auch vns mit dem gagenwurttigen brif, daz wir noch vnser spital noch anders niemant von vnsern noch von dez spitals wegen hintz den obgenanten sechs rieben noch hintz alle de vnd davon ch/omen mag vmb dheinerlai sach di genant m/ochtt sein chain ansprach noch chein voderung darauf noch darnach nicht mer haben noh gewinnen s/ullen noch enm/ugen, weder mit geistlichem noch mit werltlichem rechten noch an recht, chlein noch groz, furbaz nimmer mer noch anders niemant von vnsern wegen. Wir geloben vnd geheizzen auch in mit vnsern trewn, daz wir in di obgenanten sechs rieb vnd nicht mer mit allen den eren vnd n/uczzen die davon chomen m/ugen, versten vnd versprechen s/ullen vnd wellen mit dem rechten an aller stat, swo vnd alz offt in dez not geschicht an allen iren schaden alz rechtz aigens vnd alz dez landez, der hofmarch vnd der graschaft recht ist, da di egenanten sechs rieb inne gelegen sind. T/aten wir dez nicht, swelhen schaden si dez genomen habent oder nement mit dem rechten, den s/ullen vnd wellen wir vnd vnser spital in vnuerscheidenlichen abt/un vnd widerchern, gar vnd gentzlichen on allen iren schaden vnd gepresten, vnd si s/ullen auch denselben schaden haben auf /vns vnd auf /vnserm spital vnd auf aller der hab di wir vnd /vnser spital haben, swo wir di haben vnd swie di genant ist, bes/ucht vnd vnbes/ucht, vnd s/ullen vnd m/ugen sein swann si wellent davon bech/omen mit dem rechtten geistlichem oder werltlichem, swie si wellent, daz wir daran nicht engen noch irren s/ullen noch enmugen, chlain noch groz noch anders niemant von vnsern wegen. Wer auch ob icht brif vnd vrch/und f/urchomen, es wer f/ur recht oder an recht die /vber di vorgenanten sechs rieb sagtten, di sullen an aller stat tod vnd ab sein vnd chain chraft noch f/urganch wider den gagenwurttigen brif nicht mer haben, in dheiner weis, weder wenikch noch vil. Vnd daz in vnd allen iren eriben vnd nachkomen oder swer den gagenwurtigen brif von iren wegen inne hat vnd f/urpringet, der vorgeschriben chauf vnd gewerst also st/at vnd vnzerbrochen beleib, darvber ze einem vrch/und vnd zu einer bestaticheit geben wir in den brif versigelten f/ur /vns vnd f/ur vnser nachkomen ich vorgenanter Peter von Wansidel mit meinem insigel vnd mit vnsers spitals sand Katherein ze Regens(purch) gemeinem insigel, vnd mit des erwergen herren, dez vorgenanten Ch/unrat von Heymberch insigel, damit wir in den vorgenanten chauf vnd gewerst best/att vnd geewiget haben, er hat auch sein insigel nach vnserer vleizzigen bet an den brif gelegtt, der vorgeschriben sach zu einer gezeukchn/uzz, im selben vnenkolten vnd an schaden. Daz ist geschehen nach Christes gep/urtt dreutzehenhundert jar vnd darnach in dem sibenvndsechtzigistem jar an dem pfingst abent.