Ich Fridereich, korherr ze Altenchappel, der edeln herczogen in Bairen schreiber, vergich offenbar :I an disem prief, daz ich di ersamen pruder, den maister vnd daz spital ze Regenspurch, allez ensampt gar vnd ga'ntzleich ledich sag aller der ansprache, di mir zvgeh/oren m/ohten vmb daz paw, daz ich getan han an dem haus, daz Rora'r hof was, daz desselben spitals ze Regenspurch ist, vnd da her Hainreich der Awer, mein chorbruder nv inne ist, also daz ich f/urbaz weder vmb paw noch vmb dheinerlay ansprach hincz dem haus, dem maister, den prudern, di iezv sint oder nach in chomment, nicht ze sprechen han noch anders iemant von meinen wegen. Man schol auch wizzen, wan ich hinten hinauz gein dem Spilhof ein hofstat chauffet von einer frawen, genant dev L/uchinn, f/ur rechtez aygen. Darauz ich ein t/ur gemacht het, daz devselbe hofstat vnd auch t/ur zu dem obgenanten haus ewichleich geh/ort vnd auch darvmbe gein dem haus noch dem spital nicht ze vodern noch ze sprechen han. Vnd des sint gezeug: her Chunrat von Geyrstal, korherr ze Alten chappel, vnd her Chunrat der L/obel vnd her Leupolt der Gumpreht, paide purger ze Regenspvrch, vnd her Vlreich der chapplan dacz dem vorgenanten spital vnd pruder Albreht der maister vnd pruder Reimbot von Sch/onnberch. Vnd dar*vber ze einem vrch/und vnd ze einer mereren sicherhait gib ich disen prief versigelt mit des erberigen herren hern Seifrids des Chastners, des techents ze dem T*um ze Regenspvrch insigl vnd mit mein selbes insigl; vnd ist geschechen, da man zalt von Christes gep/urtt dreuzehenhundert iar vnd darnach in dem sechsvndzwaintzigsten iar an sand Gallen tag.