Ich Vlreich der Schust/ar zu Sl/amering, mein hawsfraw vnd alle vnser erben veriehen vnd we:Ichennen offenleich mit dem brif, daz vns her Martein der Gebenpekch, an der zeit maister dez spitals zw sand Katrein an dem fuzz der prukk zu Regen(purch) vnd gemainleich dy Samung da selb mit rat, willen vnd wizzen der heren vom chor vnd vom rat zu Regenspurch, ir vnd dez egenant spitals aigen gut mit allen rechten, ern vnd nutzzen die darczu gehorent, zw velld vnd zw dorff, besucht vnd vnbesucht, rechtt vnd redleich lassent habent mit der weschaiden daz wir dazselb gut mit aller zwgehorung alle iar j/arleich wesenleich vnd pa/wleich halten vnd pa/wen schullen mit aller arbeit die dartzu geh/ort, zu velld vnd zu dorff, besucht vnd vnbesucht nichtz auz genumen, daz ez alle czeit wesenleich vnd pawlich lig als guter pawlewt vnd pawes recht ist, trewlich an allez gevar. Auch also, daz wir in vnd dem egenanten spital alle jar j/arleich davon d/inen vnd antwurten schullen gein Chamb in die stat ayn ch/ar chorns vnd ayn char haberns Chamber mazz, vnd f/umftzikch Regenspurger pfenig zu rechtter zinszeit, allez an allen abgankch vnd an allen iren schaden, vnd welhes jars wir in der vorgeschriben d/inst vnd gult nicht g/aben vnd verrichtten in dem rechtten als vor verschriben ist, so sein wir zu hant darnach zu durchslachtt gevallen von allen den rechten dy si vns auf dem vorgenanten gut lassen habent, vnd m/ugen si dann dazselb gut lassen wem si wellent als ver daz wir noch alle vnser erben vnd nachk/umen dann f/urbaz darauf noch darnach in dheiner weis dhain ansprach noch vodrung nicht mer haben noch gewinnen sulen, noch enmugen, weder mit recht noch an recht, noch anders yemant von vnsern wegen; aber dyweil wir dez gutz gut pawlawt sein vnd in ir gult zw rechtter zeit geben, so sullen wir dez gutz vnuertriben sein. Daz das alles also st/at vnd vntzerbrochen beleib, darvber zu vrchund geben wir in den brif besigelten mit dez erbergen manns, hern Nyklas dez Valchenstainer, schulthazzen zw Chamb insigel, der daz durch vnser vleizziger pet willen an den brif gelegt hat zw einer gezeugnusse, im vnd seinen erben vnenkolten vnd an schaden, darvnder wir vns vnd alle vnser erben vnd nachkumen vnuerschaidenleich verpinden mit vnsern trewn st/at zu haben waz an dem brif geschriben stet. Daz ist geschehen nach Christy gepurtt drewtzehenhundert jar vnd in dem f/umfvndnewntzkysten jar an sand Barbara tag der heyligen junchfrawn.