Ich Vlreich der /Odmair, d/y czeit gesessen z/u Walkoffen, mein hawsfraw vnd all vnser erben, freunt vnd nachk/omen, bechennen offenlich :I mit dem brief gein aller m/anichleich, daz wir mit vnserm g/uten willen vnd nach frummer la/wt rat, cha/ufleichen verchaufft vnd z/u chauffen geben haben alz chauffes recht ist, vnserm lieben vetter, Niklas dem Juden z/u Walchoffen, seiner hawsfrawn vnd allen iren erben vnd nachk/omen, vnser der/y /akcher d/y gelegen sind z/u Walchoffen, ligt ainer an der P/uczwis, dez ist virczehen piuang, der ander ligt /uber den Illperkch ,dez ist na/wn piuang, der dritt ligt auf dem Pl/umprunn, dez ist siben piuang. Vnd d/y lehen sind gewesen von vnserm gen/adigen herrn Ch/unrad dem Michelsperger s/aligen, vnd wir haben /yn d/y geben mit allen ern, rechten vnd n/uczen, alz wir d/yselb inne gehabt vnd genossen haben, vmb ein sogetan gelt dez s/y vns trewleich an allen vnsern schaden berait gericht vnd beczalt haben, dez vns wol ben/ugt hat, also haben wir vns der egnanten /akcher verczigen vnd verczeihen vns ir auch pl/osleich mit chraft dez briefs, daz wir, vnser erben vnd nachk/omen, dhainerla/y ansprach noch voderung darauf noch darnach hinf/ur ewikleich nymmer mer haben noch gew/ynnen s/ullen noch enm/ugen, in dha/ynerla/y we/ys, weder mit recht noch an recht, noch niemant anders von vnsern wegen, trewleich an geuerd, vnd si m/ugen auch d/y obgnanten /akcher verk/umern, verchauffen oder verseczen vnd damit t/un vnd lassen wez s/y uerlusst, alz mit anderer irer aigen hab. Wir s/ullen vnd wellen in auch d/y obgnanten /akcher versten vnd vertreten mit dem rechten an aller stat, alz aigens chauffs vnd dez lanndts vnd dez gerichtz, dar/ynne d/y obgnanten /akcher gelegen sind, recht ist; ob wir in aber nicht verst/unden vnd vertr/aten waz s/y dez dann sch/aden nement, welcherla/y sch/aden daz sind, nichcz ausgenummen, d/yselben sch/aden all s/ullen s/y haben vnd bek/omen, z/u vns vnd aller vnser hab, vnd m/ugen sich der darumb wol vntterwindten, mit recht oder an recht oder wie s/y uerlusst. Vnd waz wir oder vnser erben vnd nachk/omen oder /yemant anders von vnsern wegen, hinf/ur vmb all hie uerschriben sach vnd wider den brief, mit /yn dar/uber chriegten oder rechten, mit welcherla/y rechten daz w/ar oder an recht, daz habent s/y an aller stat behabt vnd gewunnen vnd wir gein in verlorn. Daz in oder wer den brief mit irem g/uten willen inn hat vnd f/urbringt, daz allez also st/at vnd vnczebrochen beleib, z/u vrchund geben wir in den brief versigelten mit dez erbern Gotschalch dez Newchinger, d/yczeit richter z/u S/unching, aigen anhangenden insigel daz er z/u czewkchn/uss, nach vnser vleissigen pet willen, an den brief gehangen hat, /ym vnd sein erben an schaden, dar/untter verpintten wir vns mit vnsern trewn, allez daz stat z/u halten daz an dem brief verschriben ist. Der sach vnd der pet vmb daz insigel sind czewgen: Vlreich Ha/wndel, Hainreich der Wisha/y, Liebhart der P/urgtol/ar vnd Vlreich der Sch/uster, d/yczeit all vir gesessen z/u Walkoffen, vnd anderer erberger la/wt gen/ug. Daz ist geschehen do man czalt von Christi gep/urd virczehenhundert jar vnd darnach in dem f/unffczehenden jar dez pfincztags vor sand Bratholomeus tag dez heyligen czwelffpoten.