Ich Charel von Lengvelt auf dem haus, ich Perchtolt der Schonman purger ze Lengvelt in dem marcht, ich R/uger der R/udolf von Irlach vnd ich Hainreich des Raiden aydem, veriehen offenbar andisem brif daz ein chriech vnd ein irrsalwas zwischen den erbergen herren pruder Fridreichen, dem maister des spitals sand Katerein an dem f/uzz der prukk ze Regenspurch vnd der gemain der pr/uder desselben convents ze einem tail vnd Vlreichen dem Rayden von Weykerstorf ze dem andern tail, vmb einen hof gelegen ze Weykerstorf der desselben spitals aygen ist. Nv haben denselben chrieg vnd irrsal wir liepleich vertaidingt vnd gar vnd g/anczleich berichtet, also daz der vorgenant Vlreich der Rayd, der egenanten pr/uder vnd des spitals guter frevnt sein schol vnd auch furbaz iren schaden noch des spitals schaden an dehainer stat niht werben noch handeln schol, weder mit worten noch mit werchen noch mit chainerlai sachen, gesch/ach des niht vnd daz der vorgenant Vlreich der Rayd die taydinch /vberf/ur swelhen schaden dann die vorgeschriben pr/uder oder daz egenant spital von om n/amen von des obgeschriben chrieges wegen, den sch/ull wir in gar vnd g/antzleich ab tvn vnd widercheren als wir in daz pei vnsern trewen vnverschaidenleich alle zveinander gelobt vnd gehaizzen haben an gev/ar. Dar/vber ze einem vrch/vnd vnd ze einer best/atichait geben wir in disen brif versigelten mit des erbergen herren insigel, hern Eberhart von Sintzenhofen, der sein insigel nach vnserr pet an den brif gelegt hat der sache ze zevchn/vsse im selber an allen schaden, vnd verpinten vns alle vnverschaidenleich pei vnsern trewen vnder daz selbe insigel allez daz ze laisten vnd ze volf/vren vnd st/at ze behalten swaz vor an dem brif ist verschriben, wan ich vorgenanter Charel meines insigels niht gehaben mach. Daz ist geschehen, do man zalt von Christes gepurtt drevtzehenhvndert jar vnd in dem ainemvndvirtzigisten jar an sand Haymerams tag des heyligen herren.