Ich Nycla, der schreyb/ar z/u Ror, mein hawsfrawe vnd alle vnser eriben vnd nach/omen veriehen offenleichen mit dem brief allen den, die in ansehent oder h/orent lesen, :I daz vns vnser gen/adiger herr her Fridreich der Slaych, ze den zeiten maister dez spitalz sand Katrein an dem f/uzz der prukk z/u Regensp/urch vnd gemainchleich der conuent vnd die sammung daselben lazzen habent iren aigen hof, der gelegen ist z/u Helchenbach auf dem perg, mit allen den eren, rechten vnd n/uczzen di darz/ugeh/orent, ze ueld vnd ze dorf, bes/ucht vnd vnbes/ucht vnd den vormalen inne gehabt hat, Chunrat der Schwarczmair, von vnser fr/awntag z/u liechtmesse der n/u vergangen ist, darnach /vber sechs ganczew jar di schirft nacheinander ch/oment, also daz wir in di ersten zwai iar davon nicht dienen vnd geben s/ullen vnd an dem dritten iar s/ullen vnd wellen wir in dienen vnd geben ain schaf chorns vnd ain pfunt Regens(purger) pfenning wisgeltes auf sand Michelstag an allen abganch vnd darnach s/ullen vnd wellen wir in die andern drew iar dienen vnd geben aller j/arleichen ain pfunt Regens(purger) pfenning wisgelt auf sand Michelstag, alz oben verschrieben ist vnd pfenning die z/u Regens(purch) in der stat gib vnd g/ab sind vnd di traidg/ult s/ullen wir in geben nach beschaw/ung als schawens recht ist nach ires spitalz alter gewonheit. Wir s/ullen in auch allew jar j/arleichen die obgenant g/ult antwurten vnd geben gein Regens(purch) in die stat auf iren chasten, wo si hin wellent, ze rechter weil vnd zeit, als anderr herren dienst vnd g/ult recht ist, an allez verpot vnd verzoch vnd an allen iren schaden vnd gep(re)sten, vnd sullen in auch j/arleichen geben Regens(purger) mazze, awch sullen vnd wellen wir j/arleichen in ir stift ch/omen vnd irer stift recht t/un alz ander ir mair an allew widerred. Ez ist auch der obgenant gewersst vnd handlung geschehen mit willen, wizzen vnd g/unst dez obgenanten Chunr(at) dez Swarczmair, seiner hawsfr/awe vnd irer eriben vnenkolten aller schuld vnd voderung, die daz spital, der maister vnd gemainchleich der conuent hat hincz Ch/unrat dem Swarczmair, seiner h/awsfr/awn vnd iren eriben vnd der ist f/umfthalb schaf waizz, zwelifthalb schaf chorns, ains halbez schaf gersten vnd vierczehen schaf vnd aine virlinch habern, vnd f/umf pfunt vnd viervndsibenczikch Regens(purger) pfenning wisgelt; vnd di vorgenant g/ult sol dem vorgenanten Swarczmair, seiner hawsfr/awn vnd iren eriben die sechs jar vnenkolten sein vnd beleiben. Wir vergehen auch, ich vorgenanter Nicla, mein hawsfr/aw vnd alle vnser eriben vnd nachomen, ob daz obgenant spital, den spitalmaister vnd gemainchleichen den conuent vnd all ir hab, wo di gelegen ist, besucht vnd vnbes/ucht, chainerlay schaden oder irresalung auferst/und von dem obgenanten Chunr(at) dem Swarczemair, seiner hawsfr/awn vnd iren eriben oder von wem daz gesch/ach von iren wegen, wie sich daz f/ugt oder wie daz genant w/ar, di sullen vnd wellen wir in auzrichten vnd widerchern an aller stat wo in dez not geschiecht, an allew widerred vnd an allen iren schaden vnd gep(re)sten; vnd wenn auch di vorgenant sechs jar hin vnd vergangen sind, so sullen vnd wellen wir in den obgenant hof z/u Helchenbach, p/auleichen vnd wesenlichen, ligen lazzen ze ueld vnd ze dorff, an allen geprethen, also daz ich obgenanter Nicla, mein h/awsf(ra)/wn vnd alle vnser eriben vnd nach/omen noch anders yemant von vnsern wegen hincz dem obgenanten hof noch hincz allew die vnd darz/ugeh/orent, wie daz genant ist, besucht vnd vnbes/ucht, f/urbaz chain ansprach noch voderung nicht mer haben noch gewinnen sullen noch m/ugen, chlain noch groz, uil noch wenich, weder mit gaistleichem oder werltleichem rechten oder an recht in chainer weiz. Vnd darumb z/u einer bezzern sicherhait haben wir in z/usampt, vns vnuerschaidenlichen z/u porgen geseczzt die erwerigen l/aut: Hainr(eich) den Oberror/ar vnd Fridreich den Grabmair z/u Vrspach, Erharten den Puhelmair z/u Mandelchirchen vnd Otten den Merbolt z/u obern Ällenpach, also mit der beschaiden ob wir in daz allez daz oben an dem brief verschriben ist nicht st/at hielten vnd volf/urten, swelicherlay schaden si dez n/amen, wie der genant w/ar, chlain oder groz vnd den si gesprechen m/ugen bey iren tr/ewn vngerecht vnd vngesworen iren worten, darumb z/u gelauben an aid denselben schaden allen mitsampt dem hawppg/ut sullen wir in abt/un vnd widerchern, gar vnd gancz an allew widerred vnd sullen auch den haben auf vnz vnd auf vnserm obgenanten porgen vnd darz/u auf aller vnser hab, wo wir vnd si di haben, besucht vnd vnbesucht vnd sullen vnd mugen auch hawppg/ucz vnd schadens wol dauon bech/omen mit gaistleichem oder werltleichem rechten oder an recht, swann vnd swie si wellent an alle vnser irrung vnd hindernuzze, waz wir oder anders iemant von vnsern wegen mit in darumb chriegen oder rechten wolten, mit gaistleichem oder werltleichem gericht oder an recht, daz sullen wir allez verloren haben vnd si gein vns behabt vnd gewinnen an aller stat. Dez z/u vrch/und vnd best/atichait geben wir in den brief mit dez ersamen, beschaiden hern Hainreichen dez P/usch, ze den zeiten richter z/u Abensperch insigel versigelt, der ez durch vnser vleizzen pet willen an den brief gelegt hat, im an allen schaden; wann ich obgenanter Nicla selb aigens insigelz nicht enhan, verpint ich mich, mein h/awsfraw vnd alle vnser eriben vnd vnser obgenant porgen vnd der obgenant Chunr(at) der Swarczmair, sein hawsfraw vnd alle ir eriben vnd nachomen vnder daz obgenant insigel mit vnsern trewn allez daz st/at zu haben vnd volf/uren, daz oben an dem brief verschriben ist, der geben ist nach Christi gep/urtt drewczzehenhundert jar vnd in den /achtvndsibenczigistem jar dez nachsten sampcztagez vor oculi in der vasten.