Ich Chunrat der Widenman von Taymering, mein hawsfraw vnd alle vnser erben, veriechen vnd tun chunt allen den, die :I den brief ansehent oder h/orent lesen, daz vns vnser gen/adiger herre, her Fridreich der Slaich, ze den zeiten verueser des spitals sand Katreyn, an dem fuzz der prukk ze Regens(purch), vnd /vberal der conuent doselben, lazzen habent iren aygen hof ze Nazzenhard, ze veld vnd ze dorff, besucht vnd vnbesucht, der j/arleichen gelten sol sechsthalbs schaf korns vnd sechsthalbs schaf habern, also mit der beschaiden, daz wir in davon dienen vnd geben s/ullen ir g/ult nach beschawung vnd sechtzikch pfenning wisgelcz auf sand Michels tag; vnd allen chlainen dienst, hvndert air, zehen ch/as, vier gens, acht h/uner. Wir haben auch vnsern herren gehaizzen vnd gelobt, daz wir in eynen stadel s/ullen zimmern auf den vorgenanten hof, vnd daz haus pezzern nach dez hofs notdurft, an allen iren schaden. Wir s/ullen auch in ir stift chomen, swann wir darein gevodert werden vnd s/ullen mit in stifften vnd der stift recht t/un, alz ander ir mair. Wir s/ullen in auch iren hof pa/wleich vnd wesenleichen stellen, ze veld vnd ze dorff; w/ar aber, daz wir in ir g/ult nicht g/aben, mitsamt dem chlainen dienst vnd wisgelt, alz oben uerschriben ist, vnd in den hof nicht pa/wleich vnd wesenleichen stalten, oder daz wir in svst nicht mer fugten, oder von swelhen sachen sich daz fugt, so habent si vollen gewalt vns ze verchern, swann oder swelhes jars si wellent; vnd swann si vns vercherent, so s/ullen si zwen erwig man nemmen vnd wir zwen, vnd di vier s/ullen di zimmer schaczzen nach iren trewn, vnd wes di zimmer wert sind, daz s/ullen si vns widercheren nach der vier mann rat. Si s/ullen vns auch den hof versten vnd versprechen mit dem rechten von swem er anspr/ach w/urd von iren wegen; wurd er aber anspr/ach von vnsern wegen, dez s/ullen si vnenkolten sein. W/ar aber, daz wir in nicht allez daz aufrichten vnd volf/urten, daz an dem brief verschiben ist, swelhen schaden si dez nemment, den si gesprechen m/ugen bey iren trewn, an ayd vnd alle beredn/uzz, den s/ullen wir in abt/un vnd widercheren, vnd si m/ugen auch dezselben schadens mitsamt irer g/ult von vns vnd von aller vnser hab, di wir haben, swo wir die haben, besucht vnd vnbesucht, bechomen mit dem rechten oder an recht, swann oder swie si wellent. Vnd vmb swe/w wir dar/vber mit in chriegten oder rechten, mit gaistleichem oder wertleichem rechten, oder an recht, daz s/ullen si allez behabt haben vnd wir verloren haben. Vnd swann si vns vercherent, so s/ullen wir in iren hof ze Nazzenhard pa/wleich vnd wesenleichen ligen lazzen, ze veld vnd ze dorff, besucht vnd vnbesucht, das wir, weder auf den hof noch auf di pawrecht, noch auf nichtew daz zu dem hof geh/ort, dhain ansprach noch vodrung nicht iner haben noch gewinnen s/ullen, noch enm/ugen, weder mit gaistleichem noch wertleichem rechten, noch an recht, noch anders niemant von vnsern wegen. Daz in daz st/at vnd vnzerbrochen beleib, dar/vber zu einem vrch/und vnd ze einer best/atichait, geben wir in den brief versigelten mit dez erwerigen manns, Chunrat dez Tevfprunner ze Tewfprunn, insigel, daz er an den brief gelegt hat nach vnsrer vleizzen pet, der sach ze einer gezeuchn/uzz, im selben an schaden vnd auch vnenkolten, darvnder wir vns verpinden mit vnsern trewn, wan wir nicht aygens insigels haben. Des sind gezeuch: Fridreich der Widenman von Semchofen, vnser pruder Hainreich der Sch/ondel von Ekkenm/ul, Liebhart vnd Peter, di pr/obst in dem spital vnd Martein, meiner herren diener auf der prukk ze Regens(purch). Daz ist geschechen, do man zalt von Christes gep/urtt drewczehenhundert iar vnd in dem zwayvndsibenczigisten iar an dem palm abent in der vasten.