Ich graf Chunrath von Mosburch tvn chunt alen den di disen brief sehen oder horent lesen, daz der Chůnrat :I der Puller von Salaht ein hof het ze lehen von mir hiz der Harthof, des bat er mich daz ich dazselbe gůt von im ovfnem vnd tem spital ze Regenspurch gebe durch Got vnd durch sines dienstes willen send Katherine vnd den durftigen, ane vnderdige ze eigen immermere. Dazselbe gůt giltet vier schaf vnd sehzek pfenning, funfzehen chese vnd ein ænten æier, zwo gense, vier h*vner. Dazselbe gůt, als diser brief hie beschaidet, versucher vnd vnversuchet, en velde vnd en dorf, nam min herre graf Chunrat von Mosburch ovf von dem Puller vnd gab iz dem spital ze Regenspurch sand Katherine vnd den durftigen vurnames ze eigen immermere durch des Pullers beth vnd durch sin selbes sele willen. Darvmbe hat man graf Chunrat von Mosburch gehaizzen von dem spital vmbe sin sel vnd vmbe sin hail immermer ze biten ane ende. Daz div gab des gůtes also dir brief hie beschaidet graf Chunrat von Mosburch geben vnd bestet hab, bi im lemtigen do er iz wol getůn moht, des hat er disen gegen*wrtigen brief gegeben ze vrchunde mit sinem ingesigel immer mer.