Wy de rad der Nygens[tad to] Hildensem bekennen openbare in dussem breve, dat vor uns quam Brant Norden, Ilsebe syne eychlike husf[ruwe] unde bekanden vor sek unde ore erven, da[t] se beyden na orer beyder dode gelaten unde gegeven hebben ey[nen] unser stad besegelden breff, inholdende vertich Rinsche gulden uppe achteundetwyntich schillinge tinsses an [Bertr]am Ebelinges huse belegen uppe der Wu[llenw]everstrate twysschen Arneken Brandes huse unde Brant Norden huse, den olderluden sunte Lammerdes unses patronen unde den olderluden sunte Jurgens unde sunte Erasmi broderschup den beyden parten to hope, unde sunte Lammerdes olderlude schullen den ersten tins upnhemen unde schullen ock de ersten memorien holden laten in unser kerken na uthwisinge eynes radesbreves darover vorsegelt, unde den ersten tins, den [eyn] islick van den beyden parten der olderlude upnhemen des ersten [j]ares, schullen se van beyden parten fry hebben, so dat se dar neyne memorien des ersten jares dorven van holden laten. Unde effte de brodersschup sunte Jurgens unde sunte Erassmus vorvelle, so schullen de olderlude sunte Lammerdes den hovetbreff gensliken hebben myt dem tinsse. To bekantenisse dusser vorgeschrevenen stucke hebbe wy erbenomde radt unser stad ingesegel an dussen breff gehenget heten, na der bordt Christi unses heren Verteynhundert jar darna in dem sevenundenegentigesten jare, am dinxstage na sunte Elisabeth etc. lb b Ludeke Clawes. lb Cordt Weslingk.