Wi de rath der Nienstadt vor Hildensheim bekennen openbar in dussem breve, dat vor uns ist erschenen de Hakesche seligen Cordt Haken nagelaten wedwe, bekande vor sich und ore erven, dat se gelaten und tho einen rechten ervekope verkofft hebbe ohr huß und hoff sampt dersulvigen thobehoringe und gerechtigheitt alß dar tho gehorett belegen in der Hernstrate twischen Jasper Schweer und Hinrich Hagens husern und woningen, Thomasse Leverde und sinen erven. De vorbenante Hakesche heft vorthmehr vortegen und eine rechte vorticht gedan des bovengeschreven huses, bleckes und woninge mit vorticht alleß rechten, so she und ore erven daranne hadden und in jennigerleiwise bereden konden mit hande und mit munde in unser jegenwordicheitt, alles tho hantt und behoiff Thomas Levertt und sinen erven. Tho bekantenisse dusses hebben wi obgenanter rath unser stadt ingesegel an dussen breff wettenlich laten hengen, geschein im jhare nach Christi unsers hern und salichmakers gebortt Eindusent vifhundertt sesundsestig, donnerdages nach Martini. lb lb Hinrich Dunte, lb Jurgen Jurgens.