Wy de radt der Nigenstadt vor Hildenßem bekennen openbare in dussem breve, dat vor uns qwam de naghelaten husfrowe Peter van der Horst unde bekande vor seck unde ore erven, dat se ghelaten unde vorkofft hebbe tho eynem rechten ervekope or hus myt alle der gantzen woninghe unde thobehoringhe alze dar tho hort, belegen jegen unnßen markede twischen Gorries Hulpen hus unde Hermen Weigerdantzes boden unde woninghe, Gorries Hulpen unde synen hulpen. De vorbenomde frowe hefft vortmer vortegen unde eyne gantze vorticht ghedan des vorgheschreven hußes, blekes unde woninghe vor seck unde ore erven myt vorticht alles rechten, des se unde orhe erven daranne hadden unnde in jennigerleygewys bereden mochten, in unßer jegenwordicheyt myt hande unde myt munde. Tho bekantenisse dusser vorghescreven stucke hebbe wy erbenomde radt unnßer stadt inghesegell ahn dussen breff ghehenget heten, nha Christi ghebort unnßes heren Veeffteinhundert im dreunndetwintigesten jare, donredages na der Meneweken. lb lb Ludeke Brandes, lb Marten Machterßem.