Ik Tyle Elves, to desser tyd voget myns hern heren Eghardes van dem Hanenze, domprovest to Hildensem, bekenne openbare in dessem breve, de besegelt is mit mynem ingezegele, dat vor my, dar ik sath in richtestad in gehegedem gerichte to rechter dingktyd dages, quam de ersam here her Borchard Steynhoff, kelner tom dome to Hildensem, unde bekande vor sek unde syne vor syne [!] totestere unde erven, dat he hebbe vorlaten unde vorkoft to eynem rechten ervenkope de helfte an der Honser molen mit alle der wonynge unde tobehoringe, de to der halfen molen hort, boten unde enbinnen, mit aller slachten nuth Hinrikese Vrymanne, nu tor tyd pennincscriver tom dome to Hildensem, unde synen erven unde totestern. Do leyd de erbenomde Hinrik vragen eyns ordels, werme hern Borcherde Steynhove dar icht umme vraghen scholde, dat he de helfte der vorscrevenen molen mit orer tobehoringe vorlete, dar wart to rechte vunden, me scholde one dar umme vragen. So vragede one de richter dar umme van richteshalfe weghen. Des bekande he unde sede dar ja to. Do leyd Hinrik vorbenomd vragen, wu he se vorlaten scholde. Dar wart to rechte vunden, mit vingern unde mit tunghen, deme dede he also. So hefft de vorscrevene Borchard Steynhof vortmer vorteghen unde rechte vortycht gedan in gehegedem gerichte der vorbenomden halfen molen mit orer tobehoringe, de dar to hort, vor sek unde vor sine totestere unde erven mit vortichte alles rechten, des se dar anne hadden unde bereden mochten in yenigerleye wys mit hande unde mit munde. Do leyt de erbenomde Hinrik vragen eyns ordels, wer ome de richter de halven molen mit orer woninge unde tobehoringe icht scholde antwerden. Dar wart to rechte vunden, he scholde se ome antwerden, deme dede de richter also. Do leyt he nochten eyns ordels vraghen, wer de richter ome icht scholde eynen vrede werken over de helfte der vorscrevenen molen, deme dede de richter also unde wrachte ome dar eynen vrede over. Dyt is aldus gehandelt in gerichte, hir ward by gevaren mit dingkluden unde mit vorspreken maller wyse, also sek ordele unde recht uthwisende is. Vortmer ik Bertolt van Weverlinge bekenne openbare under mynem ingesegele, dat ek hir eyn vorspreke to wesen hebbe unde wy Hinrik Nyestat, Albert Spangenberch unde Hans Luttekemester bekennet under unsen ingesegelen, dat wy hir dingklude to wesen sint, unde is geschen na goddes bord Verteynhundert jar darna in dem verundedrittegesten jare, in sunte Vites dage.