Wy Hans, Hermen unde Ludeleff van Lynde brodere, Lodewiges seliger sone, bekennen openbar in dusseme breve vor uns, unse erven unde alsweme, so alse de werdigen heren domprovest, domdeken unde cappittel to Hildensem affgekofft hebben uppe eynen wedderkopp vor drytteinhundert gude Rynsche gulden van Diderike van Lynde unseme vedderen dat halve ampt to Lexstede myt luden, deinste, tegheden, richten, ungerichten, hoven, tynsen, lande, holte nemliken de Quemenborch halff, weyde, water unde aller tobehoringhe, so alse de breff, den he one darover gegeven hefft unde vorsegelt, uthwiset unde inholt, unde wy doch nu wenteher tho darinne gewillet, gevulbordet edder eyne genslike vorticht gedan hebben, aver numeer vorwille wy unde vorvulborden den sulven unsen heren deme cappittel vorbenomet jegenwordigen in unde myt crafft dusses breves, so dat se degenne edder -gennen, deme se dat bevelen des sulven halven amptes to Lexstede myt aller tobehoringhe, nichtes dar uth bescheden, alse se dat gekofft hebben, bruken schullen unde hebben myt aller nuth unde uppekome ane unse, unser erven unde jemendes van unser wegen insage edder hindernisse, solanghe wy edder unse erven one sodane ghelt, so vorgescreven is, al wol to einer vornoghe wedder enthrichtet unde betalet hebben. Hirmede vortigen wy ok jegenwordigen in crafft dusses sulven breves alles behelpes geistlikes unde wertliken rechtes, wy edder unse erven uns tegen den genanten kopp unde breff aver den kopp vorsegelt unde dussen bref behelpen mochten. Alle dusse stucke unde artikel, so vorgescreven sint, love wy vorgenante Hans, Hermen unde Ludeleff van Lynde vor uns unde unse erven deme erbenomden unde dem werdigen unsen heren deme cappittele to Hildensem in guden truwen stede, vast unde ane alle behelpp wol to holdende, unde hebben des to vorder wissenheit unde bekantnisse ein jowelk sin egen ingesegel gehenget an dussen breff, de gegeven unde geschein is na der gebord Cristi unses heren Dusent veirhundert darna in deme viffundesestigesten jare, amme donredage vor Bartholomei.