Wy Eggert van Wenden, domprovist to Hildensem, bekennen openbare in dussem breve vor alsweme, dat wy hebben beleghen unde belenen in crafft dusses breves myt hande unde myt munde also lenessrecht ys Hans Brandes, borgher to Hildensem, to eynem rechtem erffliken manlene, alse syn vader Hans Brandes zeliger van unss to lene ghehath hefft, myt drittich Hildensemer schillingen, myt dren Hildensemer peninghen unde myt der vogedie myt oren tobehoringhen beleghen up deme Eselstighe an dussen nabescrevenen husen unde woninghen: sess schillinghe der vorbenomeden weringhe an Hinrick Smedes husse, viff schillinghe unde dre peninghe an Reyneken Janberten huse, twe schillinghe an Hinrick Ripen huse, dre schillinghe an Ludeken van Honoveren huse unde vifteyn nige peninghe an sinem nigen huse darby, vifteyn peninghe an Cord Nolten huse, verdehalven schillingh an Diderick Jachauwen huse unde achteyn schillinghe an Borchardes Rodemundes husse. Alle der vorghescrevenen weringhe unde duth benomede gelt schullen de besitterss der benomeden achte husere unde woninghe rauweliken uthgheven, de helleffte up sunte Michaelis dach unde de anderen helffte uppm Paschen, unde wy Eggert domprovest vorbenomet willen unde schullen der vorghescrevenen lenware unde vogedie sin rechte gichtighe bekennighe here wesen, wur unde wanne dat van unss gheeschet wort unde des behoff unde noth ys, unde hebbet dusses to bekantnisse unse ingheseghele witliken ghehenghet laten an dussen breff, na goddes borth Verteynhundert jare darna imme deme tweundeachtigesten jare, amme sonnavende vor dominiken Letare.