Wy Eggerd van Wenden, domprovest to Hildensem, bekennet openbare in dussem breve vor alsweme, dat wy hebben belegen unde belehnen in crafft dusses breves mit hande unde mit munde alse lehnesrecht is Hanse Brandes den elderen, borger to Hildensem, to eynen rechten erffliken manlehne mit drittich Hildensemer schillingen, mit dren Hildensemer peningen unde mit der vogedie mit oren tobehoringen belegen uppe deme Eselstige an dussen nabescrevenen husen unde wonigen: ses schillinge der vorbenomden weringe an Hinrick Smedes huse, viff schillinge unde dre peninge an Reynken Janbarten huse, twene schillinge an Hinrick Ripen huse, dre schillinge an Ludeken van Honover huse unde veffteyn peninge an sinen nigen huse darby, veffteyn peninge an Cord Nolten huse, verdehalven schillingh an Diderik Jagauwen huse unde achte schillinge an Borcherdes Rodemundes huse. Alle der vorgescrevenen weringe unde duth benomde gelt schullen de besitters der benomden achte husere unde wonigen rauweliken uthgeven, de helffte uppe sunte Michael dach unde de anderen helffte uppe Paschen, unde wy Eggherd domprovest vorbenomd willet unde schullet der vorgescrevenen lehnware unde vogedie sin rechte gichtige bekennighe here wesen, wur unde wanne dat van uns geesched wart unde des behoff unde nod is, unde hebbet dusses to bekantnisse unse ingesegele witliken gehengt laten an dussen breff na goddes bord Verteinhundert jare darna in deme sesundeseventigesten jare, ame mandage erst na Omnium Sanctorum.