Wy Livinn vann Velthem doctor, domprovest tho Hildensem, bekennen openbar in dussem breve vor uns unde alsweme, dat wy belendt hebbenn unde belenhen jegenwordigen in unde mit crafft dusses breves tho eynem rechten ervenmanlehne den ersamen Henning Brandis, borgher tho Hildensem, alse den eldestenn mit der vogedie up dem Eselstige van der Nigenstadt dore, dar Godert Krudener wonth, an de strate entlangk umme den orth wente an sunte Ciriacus dore unde vort van sunte Ciriacus went an dat Hillige Cruces dore, unde mit dertich nighen schilling Hildensems unde mit dren Hildesemensen nigen penningen in den sulven woningenn ervestinses, unde mit twen hoeve landes im Wakensteder velde belegenn, unde mit drenn hoeve landes unde eynem hoffe to Dingkelvede belegenn mit allen thobehoringen unde rechtichheydenn in dorpe, in velde, in water, wische, in holthe unde in weyde, nichtes uthbeschedenn, alße zeliger Hans Brandis syn broder de sulven gude van der domprostie to Hildensem tho lenhe gedragen hefft. Wy willenn ock dusses lehns unde gudes synn bekennige here unde ware weßenn, wur unde wen ohme des noth unde behoff yss unde dat van unnß gheeschet wert. Des tho bekantnisse hebben wy unße rechte ingesegell witliken dohn hengenn an dussen breff, nha der gebort Christi unses hernn Viffteynhundert darna in dem vertheynden jare, am dage Dionisii.